Pavlodarda sheteldik áýejaılar paıdalanatyn kerosın óndiriledi
ASTANA. QazAqparat - Pavlodarda álemniń kóptegen áýejaılary paıdalanatyn kerosın óndiriledi. Bul týraly búgin Ortalyq kommýnıkatsııalar qyzmetindegi brıfıngte Pavlodar oblysynyń ákimi Bolat Baqaýov málim etti, dep habarlaıdy QazAqparat.
«Pavlodar munaı-hımııa zaýytyn jańǵyrtýdaǵy taǵy bir iri joba Eýro-5 standartyna saı ónim shyǵarý bolmaq. Munan bólek, jańǵyrtý álemdiń kóptegen áýejaılarynda ushaqtar quıatyn Jet-A halyqaralyq standartyndaǵy avıakeroısın óndirisin qaıta jolǵa qoıýǵa múmkindik beredi. 2018 jyly 170 myń tonna kerosın óndirý josparlanyp otyr. Degenmen bizdi 300-den 350 myń tonnaǵa deıin óndirýge múmkindik bolady», - dedi oblys basshysy.
Onyń aıtýynsha, Pavlodar munaı-hımııa zaýytyn jańǵyrtý jumystary josparlanǵan merzimde aıaqtalatyn bolady.
«Pavlodar munaı-hımııa zaýytyn jańǵyrtý jumystarynyń aıaqtalýy 1 qarashaǵa josparlanǵan. Premer-Mınıstr sondaı tapsyrma da berdi. Jańǵyrtý jumystaryn 1 qarashaǵa deıin aıaqtaı almaı qalamyz-aý degen qandaı da bir qaýpimiz joq. Buǵan qosa, ózderińiz de biletindeı, zaýyt jyl saıyn aǵymdyq josparly jóndeý jumystaryna 1 aıǵa toqtatylady. 26 qazanda zaýytta jóndeý jumystaryn qosa alǵandaǵy jańǵyrtýdan keıingi sýyq aýa aıdaý júrgiziledi. 1 qarashada zaýytty iske qosamyz. 2018 jyly zaýyt jyl saıynǵy josparly jóndeý jumystaryna toqtatylmaıdy», - dedi Bolat Baqaýov.
