Pavlodarda shetel qazaqtaryn oqytý kýrsy bastalady
Taraptar shetelde turatyn qandastarǵa jáne Atamekenge qonys aýdarǵan etnıkalyq qazaqtardy qoldaý baǵytynda birlesip jumys atqarýǵa kelisti.
Eki jaqty kelisim qujatyna qol qoıý sharasyna «Otandastar» qorynyń aımaqtarmen jáne memlekettik organdarmen jumys jónindegi departamenttiń basqarýshy dırektory Álııa Ábeldınova, oblys ákiminiń orynbasary Meıram Begentaev, oblystyq Іshki saıasat basqarmasynyń basshysy Ernur Dáýenov jáne Dúnıejúzi qazaqtary qaýymdastyǵynyń Pavlodar oblystyq fılıaly tóraǵasy Bolat Zaýyt qatysty.
Óz sózinde «Otandastar» qorynyń Aımaqtarmen jáne memlekettik organdarmen jumys jónindegi departamentiniń basqarýshy dırektory Álııa Ábeldınova Memleket basshysynyń tapsyrmasymen qurylǵan Qordyń maqsat-mindetteri jaıly aıtyp, josparlarymen bólisti.
«Bizdiń otandastarymyzdyń kóbi Qazaqstanmen shekaralas aýmaqtarda turatynyn eskere otyryp, qazaq dıasporasyn qoldaý maqsatynda Qor oblystyq ákimdiktermen tyǵyz yntymaqtastyq ornatyp otyr. Bul, óz kezeginde, erekshe mańyzǵa ıe. Búginde «Otandastar» qory túrli baǵyttar boıynsha birqatar jobalardy júzege asyrýda. Olar bilim, sport, mádenıet, ana tilin úıretý, bıznes-bastamalar jáne t.b. salalardy qamtıdy. Sondaı-aq, Qordyń basty mindetteriniń biri tarıhı Otanyna oralǵan qandastardyń elde beıimdelýi barysynda olarǵa aqparattyq, uıymdastyrýshylyq jáne konsýltatsııalyq kómek kórsetip, olardyń jeke quqyqtary men zańdy múddelerin qoldaý bolyp tabylady», - dedi Álııa Sapabekqyzy.
Oblys ákiminiń orynbasary Meıram Begentaev óz sózide «Otandastar qorymen» birlesip jumys jasaýǵa ázir ekenin jáne usynǵan barlyq jobalardy qoldaıtynyn jetkizdi. Oblystyq ishki saıasat basqarmasynyń basshysy Ernur Dáýenov kóshi-qon salasynda buǵan deıin atqarylǵan jumystar týraly baıandap, aldaǵy josparlarymen bólisti. Aıtýynsha, oblystyq «Ana tili» ortalyǵynda shetel qazaqtaryn oqytý kýrsy bastalady. Oǵan Reseıdiń Novosibir, Omby jáne Altaı ólkesiniń til mamandary shaqyrylǵan.
«Etnıkalyq qazaqtardy qoldaý boıynsha birqatar jumys atqaryldy. Qazirgi kúni Reseı jáne Mońǵolııa qazaqtarymen tyǵyz baılanysyp turamyz. Jaqynda Altaı ólkesiniń qazaq aýyldarynyń kitaphanalaryna Pavlodar oblysy týraly 20 kitap berildi. Sondaı-aq, birqatar ónerpazdarǵa sahnalyq kostıým tiktirip berdik. Ondaǵy qazaq dıasporasy ókilderi ana tiderin umytpas úshin ádistemelik qoldaý kórsetilýde. ıAǵnı, oblystyq tilderdi damytý basqarsynyń mamandary qazaq tili kýrstaryn ótkizip keldi», - dedi Ernur Nurlanuly.
Memorandým aıasynda taraptar Pavlodar oblysyna kelip qonystanǵan otandastardyń elde beıimdelýi men kirigýine jaǵdaı jasaýǵa nıetti. Bul, óz kezeginde, Etnıkalyq qazaqtardy ýaqytsha ornalastyrý ortalyǵynyń negizinde júzege asyrylatyn bolady. Sondaı-aq, Qor men Pavlodar oblysynyń ákimdigi osy Memorandýmnyń maqsattaryna sáıkes keletin mádenı saýattylyqty arttyrý, bilim berý, sport, bıznes jáne basqa da is-sharalarǵa jan-jaqty uıymdastyrýshylyq jáne tehnıkalyq qoldaý kórsetedi.
Pavlodar oblysyna jumys sapary aıasynda «Otandastar» qorynyń ókilderi Etnıkalyq qazaqtardy ýaqytsha ornalastyrý ortalyǵyna baryp, ondaǵy jaǵdaımen tanysyp qaıtty.
