Pavlodarda sheneýnikter trotýarǵa qajet materıaldardy úsh ese kóp qylyp kórsetken
PAVLODAR. KAZINFORM - Pavlodar qalasynyń prokýratýrasy memlekettik satyp alýlarǵa júrgizilgen taldaý barysynda Ortalyq skverdi jóndeýdi josparlaý kezinde zań buzýshylyqtardy anyqtady.
Belgili bolǵandaı, Ortalyq skverdi jóndeýdi josparlaý barysynda smetalyq qujattamaǵa kólemi 25 myń sharshy metrden asatyn trotýar plıtalaryn tóseý jumystary, sondaı-aq quny 368 mln teńgeden asatyn dál osyndaı kólemdegi beton plıtalaryn satyp alý engizilgen.
- Bul rette skverdiń jalpy aýmaǵy shamamen 25 myń sharshy metr jáne onyń quramyna kógaldar, jasyl jelekter, aǵashtar men tóseýge jatpaıtyn ashyq topyraq ýchaskeleri kiredi. Júrgizilgen ólsheýler nátıjesinde trotýar plıtalaryna naqty qajettilik 9 myń sharshy metrden aspaıtyny anyqtaldy. Osylaısha, jobada kózdelgen jumys kólemi men materıaldar naqty qajettilikten edáýir asyp ketken. Bul bıýdjet qarajatynyń negizsiz jumsalý qaýpin týdyrǵan, - dep habarlady óńirlik prokýratýradan.
Prokýrorlyq qadaǵalaý aktisi boıynsha memlekettik satyp alý rásimi toqtatylyp, kináli laýazymdy tulǵa jaýapkershilikke tartylǵan.
Buǵan deıin Ekibastuzda prokýrorlar aýyl sharýashylyǵy jerleriniń zańsyz berilýiniń jolyn kesken bolatyn.
