Pavlodarda sheneýnikter baspana qurylysyna bólingen 350 mln teńgeni «súrge saqtap» qoıǵan

PAVLODAR. KAZINFORM — Tereńkól aýdanynyń ákimdigi turǵyn úıge bólinip, ıgerilmeı qalǵan bıýdjet qarajatyn arnaıy shotta jasyryp ustap kelgen.

Óńirlik prokýratýra málimetinshe, byltyr Tereńkól aýdanynda áldebir merdiger 24 páterli úı turǵyzýdy mindettengen. Ony keıin jergilikti bılik bıýdjet qarajatyna satyp almaqshy bolyp kelisken. Alaıda qurylys salýshy baspanany ýaqytynda tapsyra almaı qalǵan. Al jergilikti bılik ókilderi qurylysqa bólingen 350 mln teńgege jýyq qarajatty ózderi ashqan arnaıy shotqa aýdaryp qoıypty. Sheneýnikter qarajat ıgerilmeı qalady dep qoryqsa kerek.

— Kelisimshart 2024 jyldyń jeltoqsan aıynda jasalǵan. Aqshany aýdarý kezinde páterler tehnıkalyq sıpattamaǵa saı bolmaı shyqqan. Tereńkól aýdanynyń prokýratýrasy sáıkesinshe aýdarylǵan aqsha negizsiz dep tanyp, ony qaıtarýǵa qadaǵalaý aktin engizdi. Qazirgi ýaqytta aqshalaı qarajat tolyq kólemde qaıtaryldy, — deıdi prokýror Ádil Jumabekov.

Belgili bolǵandaı, atalǵan turǵyn úı áli kúnge tapsyrylmaǵan. Prokýratýra bul jaıtty sybaılas jemqorlyq dep tanyp, aýdandyq sáýlet jáne qala qurylysy bóliminiń basshysyn jaýapqa tartýdy talap etip otyr.

Eske sala keteıik, Abaı oblysynda prokýrorlardyń arqasynda 160 mln teńge bıýdjet qarjysy únemdeldi.