Pavlodarda Sháken kınolarynyń aptalyǵy bastaldy
PAVLODAR. KAZINFORM - Qazaq kınosynyń tuńǵysh rejısseri Sháken Aımanovtyń 110 jyldyǵyna arnalǵan «Bizdiń súıikti Sháken» atty kıno aptalyǵy bastaldy. Kópshilik bir apta boıy flmderin tegin kóre alady.
Sh.Aımanovtyń rejısserligimen 11 kınofılm túsirilse, taǵy 11 kınotýyndyda ózi akter bolyp oınaǵan. Kıno ónerindegi jarqyn eńbegi úshin KSRO Memlekettik syılyǵymen, Baıseıitova atyndaǵy Qazaq KSR memlekettik syılyǵymen, Lenın, Eńbek Qyzyl Tý, «Qurmet belgisi» ordenderimen marapattalǵan.
Aptalyqtyń bastaýlyna oraı ótken rýhanı keshte Sh.Aımanov oryndaǵan halyq ánderi shyrqalyp, týyndylary pash etildi. Buqar jyraý atyndaǵy ádebıet jáne óner mýzeıi jınalǵandar nazaryna áıgili jerlesimizge qatysty fotosýretter men jeke zattarynan turatyn kórmeni usyndy.
Іs-shara uıymdastyrýshysy - Estaı atyndaǵy mádenıet saraıynyń basshysy Sapar Shaıhımovtyń aıtýynsha, Q.Ábýseıitov atyndaǵy mádenı-saýyq ortalyǵynda 15 aqpannan Sháken kınolary tegin kórsetile bastady. Kórermender bir apta boıy «Aldar kóse», «Taqııaly perishte», «Jambyl», «Bizdiń súıikti dáriger», «Biz osynda turamyz», «Dala qyzy», «Án shaqyrady», «Atameken» fılmderin tamashalaı alady.