Pavlodarda Shákárimtaný ortalyǵy ashyldy
Mektep dırektorynyń orynbasary Meıramgúl Alashbaevanyń aıtýynsha, atalmysh shara «Rýhanı jańǵyrý» baǵdarlamasy men oıshyl, aqyn, jazýshy, fılosof, tarıhshy, kompozıtor Shákárim Qudaıberdiulynyń 160 jyldyǵy aıasynda júzege asqan.
«Bul ortalyqta aqynnyń eńbekteri ornalastyryldy, Semeı qalasynan arnaıy jýrnaldar ákelindi. Mektebimizdegi Shákárimtaný úıirmesiniń jetekshisi, qazaq tili men ádebıeti pániniń muǵalimi Janna Tóleýbaeva ortalyqtyń josparyn quryp, saıtyn ashty. Osy jerde oqýshylar óz bilimderin shyńdaı alady. Bizdiń mektepte Shákárim oqýlarynda, án baıqaýlarynda jeńiske jetken oqýshylarymyz bar», - deıdi Meıramgúl Alashbaeva.
Shákárim Qudaıberdiulynyń urpaǵy Quralaı Ýaqbaeva ortalyqtyń ashylýyna qolushyn sozǵan oblys ákimi Bolat Baqaýovqa jáne birqatar zııaly qaýym ókilderine alǵysyn aıtty.
«Ótken jyldyń 17 aqpan kúni osy sharany júzege asyrý jumystaryn qolǵa aldyq. Bir jyl boıy qajetti qujattar men materıaldardy jınadyq. Semeıdegi Shákárim atyndaǵy memlekettik ýnıversıtet pen Jıdebaıdaǵy Abaı murajaıynda bolyp, derekter men kitaptardy alyp keldim. Qundy dúnıeniń bári óskeleń urpaqqa mol paıdasyn tıgizedi degen úmittemin. Elim, jerim dep ótken Alashtyń arysyna qarap jas býyn boı túzeý kerek. Ortalyqty ashý úshin kóp adam kómek qolyn sozdy. Barlyǵyna sheksiz rızamyn», - deıdi aqynnyń shóberesi.
Shara barysynda Quralaı Ýaqbaeva «Qart ólimi» ánin tartý etip, oblystyq ishki saıasat basqarmasynyń basshysy Ernur Dáýenovpen birge ortalyqtyń lentasyn kesti.
