Qazaqstanda bilim alatyn sheteldik stýdentter sany 35 myńnan asty
ASTANA. KAZINFORM — Qazaqstannyń joǵary oqý oryndarynda 2025-2026 oqý jylynda álemniń 88 elinen kelgen 35 075 sheteldik stýdent bilim aldy.
Bul kórsetkish aldyńǵy oqý jylymen salystyrǵanda 11%-ǵa joǵary. Sheteldik stýdentter sanynyń artýy Qazaqstannyń Ortalyq Azııadaǵy bilim berý ortalyǵy retindegi halyqaralyq tartymdylyǵynyń artyp kele jatqanyn kórsetedi.
Joǵary bilimniń halyqaralyq básekege qabilettiligin arttyrý – Qazaqstan Respýblıkasynyń 2023-2029 jyldarǵa arnalǵan joǵary bilim men ǵylymdy damytý tujyrymdamasynyń basym baǵyttarynyń biri. Memleket basshysynyń tapsyrmasyna sáıkes 2029 jylǵa qaraı elimizde bilim alatyn sheteldik stýdentter sanyn 100 myń adamǵa deıin jetkizý josparlanyp otyr.
Qazaqstanda bilim alýǵa degen qyzyǵýshylyqtyń artýyna bilim berý qyzmetteriniń qoljetimdi quny, eldiń tıimdi geografııalyq ornalasýy, aǵylshyn tilindegi bilim berý baǵdarlamalarynyń keńeıýi, sondaı-aq medıtsına, ınjenerııa jáne aqparattyq tehnologııalar salalaryndaǵy mamandarǵa degen joǵary suranys yqpal etedi.
Búginde Qazaqstanda Cardiff University, Coventry University Kazakhstan, sondaı-aq AQSh, Ońtústik Koreıa, Italııa, Reseı, Qytaı, Frantsııa jáne basqa da elderdiń joǵary oqý oryndaryn qosa alǵanda, 30-dan astam sheteldik ýnıversıtettiń fılıaly jumys isteıdi. Olardyń qyzmeti kadrlar daıarlaý sapasyn arttyrýǵa, akademııalyq yntymaqtastyqty keńeıtýge jáne otandyq joǵary bilim berý júıesiniń halyqaralyq yqpaldastyǵyn nyǵaıtýǵa múmkindik beredi.
100 myń sheteldik stýdentti tartý jónindegi strategııalyq maqsatqa qol jetkizý úshin aǵylshyn tilindegi bilim berý baǵdarlamalaryn damytýǵa, ýnıversıtetterdiń ınfraqurylymyn jańǵyrtýǵa, stýdenttik jataqhanalar jelisin keńeıtýge, sondaı-aq sheteldik stýdentterdiń bilim alýy men turýyna qolaıly ári qaýipsiz jaǵdaı jasaýǵa erekshe nazar aýdarylady.
Bilim berý qyzmetteriniń eksportyn damytý boıynsha júrgizilip jatqan keshendi jumys Qazaqstannyń álemdik joǵary bilim keńistigindegi básekege qabilettiligin arttyrýǵa jáne elimizdiń óńirdegi jetekshi akademııalyq ortalyqtardyń biri retindegi mártebesin nyǵaıtýǵa yqpal etedi.
Aıta ketelik Almaty men Astana álemdegi úzdik stýdenttik qalalar reıtınginde joǵarylaǵan edi.
