Pavlodarda segizinshi qabattan qulap ketken 2 jasar búldirshin aýrýhanada kóz jumdy
NUR-SULTAN. QazAqparat - Pavlodarda segizinshi qabattan qulap ketken búldirshinniń júregi toqtap qaldy. Eki jasar sábıdiń ómirin saqtap qalý úshin dárigerler baryn saldy, dep habarlaıdy @Pavlodarnews.kz.
Bul týraly Pavlodar oblystyq densaýlyq saqtaý basqarmasynyń baspasóz qyzmeti málimdedi.
- Kóp qabatty turǵyn úıdiń 8-qabatynan qulap ketken 2020 jyly dúnıege kelgen sábıdiń júregi búgin saǵat 21.00-de toqtady. Ókinishke qaraı, onyń ómirin saqtap qala almadyq, - delingen habarlamada.
Eske sala keteıik, qaıǵyly jaǵdaı M.Júsip kóshesi, 270-úıde oryn aldy. Eki jasar búldirshinniń qulaǵany týraly qońyraý 6 qyrkúıek kúni saǵat 11:17-de tústi. Oqıǵa ornyna jedel járdem qyzmeti 4 mınýtta jetti.
Bala Pavlodar oblystyq balalar aýrýhanasyna jetkizilip, óte aýyr jaǵdaıda jansaqtaý bólimine tústi. Dereý shokqa qarsy reanımatsııalyq is-sharalar bastaldy. Alǵan jaraqattary óte aýyr boldy.
