Pavlodarda saıajaılar órtenip jatyr
PAVLODAR. QazAqparat – Pavlodar qalasynda Lımonnaıa kóshesindegi «Metallýrg» saıajaıynda órt shyqty, dep habarlaıdy Pavlodarnews.kz.
Otqa oranǵan saıajaılardyń vıdeosy áleýmettik jelilerde paıda boldy.
- 30 mamyrda saǵat 11:08-de Pavlodar qalasy, «Metallýrg» saıajaıynda órt shyqqany týraly habarlama kelip tústi. Qamys janyp jatyr, órttiń aýmaǵy belgilenýde. Oqıǵa ornynda jeke quramnyń 20 adamy men 6 tehnıka jumys isteýde, - dedi oblystyq tótenshe jaǵdaılar departamentiniń baspasóz qyzmetinde.
Eske salaıyq, buǵan deıin departament basshysy jýrnalısterge sońǵy kezde Pavlodarda saıajaılardyń nelikten derlik kún saıyn órtenip jatqanyn aıtqan bolatyn.
Mamandar órttiń negizgi sebebi otty abaısyz paıdalaný bolyp tabylady deıdi. Kezdeısoq ushqynnyń saldarynan órt kórshi saıajaılarǵa taralýy múmkin. Al, saıajaılardyń kópshiligi burynnan qaraýsyz qalǵan, butalar ósip ketken.
Kásipkerlik bóliminiń málimdeýinshe, 19 pavlodarlyq baqta 44 934 saıajaı bar. Olardyń jartysy qaraýsyz qalǵan.
