Pavlodarda sáýir aıynyń sońynda 30 gradýstyq ystyq bolady
PAVLODAR. KAZINFORM – Aýa raıyn boljaýshylardyń málimetinshe, sáýir aıynda temperatýra birtindep kóterilip, aıdyń sońyna qaraı +33 gradýsqa deıin jetýi múmkin.
«Qazgıdromet» RMK Pavlodar fılıaly sáýir aıynda aýa temperatýrasy normadan bir gradýsqa joǵary bolatynyn habarlady.
Termometr baǵandary alǵashqy onkúndikte kúndiz +10... +15 gradýs aralyǵynda qubylady. Túnde -3... -8 gradýs sýyq bolady dep boljanýda. Ekinshi onkúndikte kún shýaǵy aıtarlyqtaı sezile bastaıdy: temperatýra kúndiz +20... +25-ke deıin, túnde +4... +9 gradýsqa deıin kóteriledi.
– Aıdyń sońyna taman meılinshe ystyq aýa raıy kútilip otyr. Kúndiz temperatýra +30 gradýsqa deıin kóterilse, túngi ýaqytta +10 gradýsqa deıin jyly bolady. Jaýyn-shashyn týraly aıtar bolsaq, aıdyń alǵashqy jartysynda túnniń salqyndyǵyna baılanysty jańbyr aralas qar jaýýy múmkin. Al aıdyń sońynda joǵary temperatýranyń áserinen kún kúrkireýi yqtımal, - dep habarlady «Qazgıdromet» RMK Pavlodar fılıalynyń meteoboljamdar bóliminiń basshysy Irına Anohına.
Mamandardyń sózinshe Pavlodar oblysynda mundaı aýa raıy sońǵy ret 2010 jyldyń sáýirinde baıqalǵan. Al osy mezgildegi eń joǵary temperatýra 1972 jyly tirkelgen – ol kezde termometr baǵandary +34 gradýsqa deıin kóterilgen. Al eń sýyq sáýir 1969 jyly bolypty, kún -27 gradýsqa deıin aıazdatqan.
Buǵan deıin SQO-da sáýir aıynda aýa raıy qandaı bolatynyn jazǵanbyz.
