Pavlodarda saýda erejesin buzǵan kásipkerlerge 4,5 mln teńge aıyppul salyndy
ASTANA. KAZINFORM — Óńirdegi Saýda jáne tutynýshylardyń quqyqtaryn qorǵaý departamentiniń málimetinshe, salynǵan 139 aıyppuldyń basym bóligi áleýmettik mańyzy bar azyq-túlik taýarlarynyń baǵasyn negizsiz kóterýge qatysty.
2026 jyldyń 10 aıynda saýda zańnamasyn buzǵan kásipkerlerge jalpy somasy 4,5 mln teńge aıyppul salynǵan. Osy kezeńde kásipkerlerge qatysty 166 josparly jáne jospardan tys tekserý júrgizilgen.
Tekserý qorytyndysy boıynsha 144 kásipker jaýapkershilikke tartyldy. Olardyń 139-yna aıyppul salynǵan.
Atap aıtqanda, áleýmettik mańyzy bar azyq-túlik taýarlaryna belgilengen saýda ústemesiniń shekti mólsherin asyra kótergeni úshin jalpy somasy 1,5 mln teńge bolatyn 103 ákimshilik aıyppul salyndy.
— Baǵany turaqtandyrý jáne áleýmettik mańyzy bar azyq-túlik taýarlary qunynyń negizsiz ósýine jol bermeý maqsatynda departament turaqty túrde baǵa monıtorıngin júrgizip, saýda qyzmeti salasyndaǵy zańnama talaptarynyń saqtalýyn baqylaýda. Baǵa belgileý zańnamasynyń buzylýyna jol bermeý jáne tutynýshylardyń quqyqtaryn qorǵaý jumystary jalǵasyp jatyr, — dep habarlady Pavlodar oblysynyń Saýda jáne tutynýshylardyń quqyqtaryn qorǵaý departamenti.
Eske sala keteıik, Almatyda azyq-túlik baǵasyn negizsiz kótergen kásipkerlerge 80 mln astam aıyppul salyndy.
