Pavlodarda satylyp jatqan qarbyz ben qaýyndy jeýge bolmaıdy - BAQ
PAVLODAR. QazAqparat - Pavlodar oblysynda satylyp jatqan qaýyn-qarbyzdardyń quramyndaǵy nıtrat mólsheri normadan birneshe ese kóp bolyp shyqty, dep habarlaıdy QazAqparat pavlodarnews.kz saıtyna silteme jasap.
QR Densaýlyq saqtaý mınıstrligi Taýarlar men kórsetiletin qyzmetterdiń sapasy men qaýipsizdigin baqylaý komıtetiniń Pavlodar oblystyq departamenti baqsha daqyldarynyń quramyndaǵy nıtratty tekserý aktsııasyn ótkizýde.
«Qazir qarbyz ben qaýynnyń quramyndaǵy nıtrat mólsherin anyqtaýdamyz. Jyl saıyn osy kezeńde ońtústik óńirlerden áli pispegen baqsha daqyldary jetkiziledi. Olardyń nıtrattaryn tekseremiz. Ótken jyly jaz boıy 800 synama alynyp, 20-dan astamynan nıtrattyń mol mólsheri anyqtalǵan bolatyn. «Torpedo» qaýynynda 2-3 ese kóp nıtrat anyqtalǵan», - dedi departamenttiń bólim basshysy Gúlnár Aqylbekova. 
Bıyl nıtrat boıynsha tekserý aktsııasyn departament ókilderi Pavlodar qalasyndaǵy «Rahmet» bazarynan bastady.
«Bul bazardaǵy qarbyz ben qaýyndarda nıtrattyń mólsheri 2-3 ese kóp bolyp shyqty. Norma boıynsha qarbyzda - 60 mıllıgramm, qaýynda 90 mıllıgrammǵa deıin nıtrat bolý kerek bolsa, bundaǵy ónimderde 200-den bastalyp, 300 mıllıgramnan asady. Normaǵa saı keletin eshqandaı ónim joq. Endi ónimderdiń oblysta taralmaýy úshin shara qoldanamyz. Bular elimizdiń ońtústik óńirlerinen kelgen ónimder. Jetkizilgen kólikterdiń nómirin jazyp aldyq. Ońtústik áriptesterimizge hat jiberemiz. Jergilikti ákimdikke, aýyl sharýashylyǵy basqarmasyna jáne polıtsııa departamentine shara qoldaný jóninde eskertemiz. Sondaı-aq kóshelerdegi satylym oryndaryn da aralaımyz. Tutynýshylardan Omby tas jolynda, Saıajaıda satylyp jatqanyn bildik. Dalada satylǵan ónimderde nıtrattan basqa aýyr metalldar kóbeıedi. Ol da qaýipti», - dedi Gúlnár Aqylbekova. 
Gúlnár Aqylbekovanyń aıtýynsha, aktsııadan keıin departament resmı tekserýdi bastaıdy. Resmı tekserý nátıjesinde nıtrat mólsheri mol ekeni anyqtalsa, zańdy jáne jekeleı tulǵalar ákimshilik jaýapkershilikke tartylyp, 200-300 AEK mólsherinde aıyppul salynady. Sonymen qatar, departament óńir turǵyndaryna ásirese, ata-analarǵa qazirgi kezde qarbyz ben qaýyndy tutynýǵa bolmaıtynyn eskertedi.
«Bizdiń mindetimiz halyqqa bul ónimderdiń qaýipti ekenin jetkizý. Baqsha daqyldary qazir óte qaýipti. Olar tamyz aıynda ǵana pisedi. Búginde daqyldar ótkir ýlanýmen qaýipti. Adamnyń qansha tutynǵanyna baılanysty. Nıtarttar ózi qaýipti emes. Organızmge engende nıtrıtke aınalady. Nátıjesinde baýyr, búırek zaqymdalyp, kórý qabileti nasharlaıdy. Qanmen aınalyp, barlyq múshege zııan kelýi múmkin. Ásirese, balalarǵa qaýipti. Ata-analarǵa áli erte ekenin aıtqymyz keledi», - dedi bólim basshysy.
Aıta keteıik, aktsııa barysynda bazardaǵy baqsha daqyldarynyń birazy oblys boıynsha taralyp ketkeni belgili boldy. Satýshylardyń qolynda fıtosanıtarlyq qyzmetten satylymǵa shyǵarýǵa bolatyny jóninde ruqsat qaǵazy bar. Alaıda, fıtosanıtarlyq qyzmette ónim quramyndaǵy nıtrat mólsheri tekserilmeıdi. Taýarlar men kórsetiletin qyzmetterdiń sapasy men qaýipsizdigin baqylaý komıtetiniń Pavlodar oblystyq departamenti satylymdaǵy ónimderdi joıýǵa nusqaý beretin bolady.
