Pavlodarda satýshysy joq ekinshi dúken ashyldy
Bul týraly atalǵan joǵary oqý orny jastar saıasaty departamentiniń dırektory Erkebulan Kúntýǵan málim etti.
«Dúkendi ashýǵa oblystyq memlekettik qyzmet jáne sybaılas jemqorlyqqa qarsy is-qımyl departamenti sebepker boldy. Bul aktsııany Ońtústik óńirlerdiń joǵarǵy oqý oryndary bastaǵan bolatyn. Qazir búkil Qazaqstan boıynsha jalǵasyp jatyr. Munda eshqandaı satýshy joq. Arnaıy baqylaý ornatylmaǵan. Ol dúkende stýdentterge qajetti keńse zattary, jeke basyna paıdalanýǵa arnalǵan zattar, kerekti taǵamdar, sýsyndar bar», - dedi Erkebulan Kúntýǵan.
Onyń aıtýynsha, satyp alýshylar ózine kerekti zatty alyp, kórsetilgen baǵa boıynsha aqshasyn arnaıy qorapqa qaldyryp kete beredi.
«Bul dúkenniń maqsaty - stýdentterdi adaldyqqa, adamgershilikke tárbıeleý. Bizdiń departamenttiń qyzmetkerleri keshke qaraı dúkendegi zattardyń azaıǵanyn tolyqtyryp, tazalap turady. «ADAL SHOP» jumysy kádimgi dúkenderdiń júıesimen júrgiziledi. Túsken paıdaǵa qaıtadan satýǵa zattar alynady», - dedi departament dırektory.
Aıta keteıik, dúken jumysyn negizinen ýnıversıtettiń eriktileri júrgizedi. Túsken qarjyny ýnıversıtet eriktileri jetim balalarǵa, áleýmettik álsiz toptyń ókilderine kómektesý sııaqty qaıyrymdylyq sharalaryna jumsaıdy.
Aıta ketsek, buǵan deıin Innovatsııalyq Eýrazııa ýnıversıtetinde «Adaldyq dúkeni» atpen alǵash ret erekshe dúken ashylǵan.
