Pavlodarda satyp alý tártibin saqtamaǵan monopolıst aıyppul tóledi
PAVLODAR. KAZINFORM - Tabıǵı monopolııa sýbektileriniń erejesin buzǵan «Pavlodarenergo» AQ-ǵa qatysty ákimshilik is qozǵalyp, 3,1 mln teńge mólsherinde aıyppul salyndy.
Tabıǵı monopolııalardy retteý komıtetiniń Pavlodar oblysy boıynsha departamenti «Pavlodarenergo» AQ-nyń satyp alý tártibin saqtaý máseleleri boıynsha kezekten tys tekserý ótkizgen. Tekserýge «QazkovEnergy» JShS-nyń ótinishi sebep bolǵan.
- Tekserý «Pavlodarenergo» kompanııasy 2025 jyly júrgizgen satyp alýlardyń zańdylyǵyna qatysty boldy. Nátıjesinde QR «Tabıǵı monopolııalar týraly» Zańynyń 26-babynyń 2-tarmaǵynyń 18-tarmaqshasynda, sondaı-aq tabıǵı monopolııa sýbektileriniń qyzmetin júzege asyrý erejeleriniń 135 jáne 152-tarmaqtarynda kózdelgen talaptardyń buzylýy anyqtaldy. Satyp alýdy júrgizý tártibin saqtamaýshylyq baıqaldy, - dep habarlady departamentten.
Sýbektige qatysty QR «Ákimshilik quqyq buzýshylyqtar týraly» Kodeksiniń 164-babynyń 4-bóligi boıynsha ákimshilik is qozǵalǵan. Tergeý nátıjesinde kásiporynǵa jeńildetilgen tártipte 3 145 600 teńge mólsherinde ákimshilik aıyppul salyndy.
Sonymen qatar, departament tarapynan satyp alý nátıjelerin joıý jáne qoldanystaǵy zańnama talaptaryna sáıkes qaıta satyp alý protsedýrasyn júrgizý qajettiligi týraly talap berildi.
Eske sala keteıik, pavlodarlyq monopolıst tarıfti negizsiz kótergeni úshin 6,5 mln teńge aıyppul tóledi.