Pavlodarda Saryarqa samaly gazetiniń alǵashqy redaktoryna taǵzym taqta ashyldy
Saltanatty rásimge Nur Otan partııasy oblystyq fılıaly tóraǵasynyń birinshi orynbasary Ilıa Terenchenko, QR Parlamenti Senatynyń depýtaty, hımııa ǵylymdarynyń doktory Altynbek Nýhuly, sondaı-aq Almaty jáne Nur-Sultan qalalarynan akademık Beısenbaı Kenjebaıulynyń urpaqtary Qaırat Qadyrbekov, Janar Jumabaeva, Ádil Bekturov arnaıy qatysty.
Beısembaı Kenjebaıuly ǵalym, túrkitanýshy, ádebı synshy, aýdarmashy, fılologııa ǵylymdarynyń doktory, professor. Ońtústik Qazaqstan oblysy Ordabasy aýdany Bógen aýylynda týǵan. 1929 jyly tuńǵysh Pavlodar okrýginiń «Keńes týy» atty gazetiniń negizin qalap, basshylyq etken belgili pýblıtsıst, uıymdastyrýshy.
QR Parlamenti Senatynyń depýtaty Altynbek Nýhuly tarıhı tulǵaǵa taǵzym retinde arnaıy «taǵzym taqtasy» ashylyp otyrǵanyn atap ótti.
- Beısembaı Kenjebaev nebári 25 jasynda baspa quraldaryn ákelip, gazettiń irgetasyn qalady. Tarıhta orny bólek, taý tulǵa azamat retinde qalady. Jeke bastyń qamy emes, ulttyq múdde úshin eńbek etip, qazaq halqynyń aıtylmaı jatqan dúnıelerin Keńestiń qytymyr zamanynda batyl aıta bilgen. Sol úshin talaı taıaq ta jedi. Qazir qazaq entsıklopedııasy sanalatyn «Abaı jolyn» alǵash baspadan shyǵardy. Sol zamanda Áýezovtyń jolyn ashqan osy Beısenbaı Kenjebaev. Aıta berse erligi kóp. Búgin taǵzym taqtasynyń ashylýy zańdylyq. Taqtaǵa «taǵzym taqta» dep jazdyq. Óıtkeni, osyndaı uly tulǵaǵa bizder ómir boıy taǵzym etýimiz kerek, - dedi Altynbek Nýhuly.
Beısenbaı Kenjebaıulynyń urpaǵy hımııa ǵylymdarynyń doktory Qaırat Qadyrbekov atalary ǵylymda óz mektebin qalyptastyrǵanyn aıtty.
- Beısenbaı atamyz úlken ǵalym. QazMÝ-de júrgen kezde 42 ǵylym kandıdatyn, 3 ǵylym doktoryn daıyndapty. Olardyń bári elge belgili jazýshy, ǵalymdar. Muhtar Maǵaýın, Ábish Kekilbaev, Myrzataı Joldasbekov dep tizilip kete beredi. Ol kisiniń óziniń ustazdary da myqty boldy. Máskeýde Mirjaqyp, Beıimbetterdiń janynda júrdi. Ulttyq rýh jolynda aıanbaı jumys istegen. Osyndaı tulǵaǵa qurmet kórsetip jatqan sizderge Beısenbaı Kenjebaevtyń ońtústiktegi urpaqtarynyń, jaqyndarynyń sálemin alyp keldim. Pavlodar óńirine, bundaı taqtanyń ashylýyna sebepker bolǵan jandarǵa alǵys bildiremiz, - dedi Qaırat Qadyrbekov.
Shara sońynda jınalǵan mártebeli qonaqtar, qoǵam qaıratkerleri, zııaly qaýym ókilderi men jýrnalıster taǵzym taqtasyna gúl shoqtaryn qoıdy.
Beısembaı Kenjebaev – qazaq ádebıetiniń máselelerine, qazaq baspasóziniń tarıhyna arnalǵan irgeli eńbekterdiń, Abaı Qunanbaıuly, Sultanmahmut Toraıǵyrov, Jambyl Jabaev, Muhamedjan Seralın, Muhtar Áýezovterdiń ómiri men shyǵarmalary týraly zertteýlerdiń avtory. Keńestik kezeńde kommýnıstik ıdeologııaǵa oraı HІH ǵasyrdaǵy qazaq ádebıetiniń tarıhyn Buhar jyraýdan bastalady degen jansaq pikirdi teriske shyǵaryp, onyń Orhon-Enıseı jazbalarynan bastalatyndyǵyn ǵylymı turǵydan dáleldegen.
Kórkem proza jáne aýdarma salasynda da kóp eńbek etken. 1928 jyly «Asaý júrek» áńgimeler jınaǵy jaryq kórgen. Pýshkınniń shyǵarmalarynyń qazaqsha bıblıografııalyq kórsetkishin jasaǵan. Kóptegen orys jáne shetel jazýshy-aqyndarynyń shyǵarmalaryn qazaq tiline tárjimalaǵan. «Lenın» ordenimen jáne birneshe medaldarmen marapattalǵan.
