Pavlodarda salynyp jatqan jańa kópirde taǵy da órt shyqty
PAVLODAR. KAZINFORM - Qurylys nysanynda oqshaýlaý materıaldary, qorǵanys shatyry jáne aǵash qalyptardyń konstrýktsııalary otqa oranǵan. Órttiń aýdany shamamen 100 sharshy metr.
Búgin tańerteń Ertis ózeni ústinen salynyp jatqan jańa avtokólik kópiriniń tirek qurylysy órtke orandy. Oqys oqıǵa №5 tirekte tirkelgen.
- 1 aqpan kúni «101» operatorynyń pýltine salynyp jatqan kópirdegi órt týraly habarlama kelip tústi. Oqıǵa ornyna dereý órt-qutqarý bólimsheleri jiberildi. Nysandaǵy oqshaýlaý materıaldary, qorǵanys shatyry jáne aǵash qalyptar konstrýktsııalary órtengen. Órtengen aýmaq bıikte ornalasýy sebepti sóndirý barysynda biraz qıyndyqtar týyndady, - dep habarlady óńirlik Tótenshe jaǵdaılar departamentinen.
Órt sóndirýshiler jalpy aýdany 100 sharshy metrge taralǵan jalyndy tolyǵymen aýyzdyqtap , sóndirgen. Kópirdiń basqa qurylymdaryna ottyń taralýyna jol berilgen joq.
Mamandardyń aıtýynsha, jalynnyń tutanýyna elektr jabdyqtaryn paıdalaný kezinde órt qaýipsizdigi talaptaryn saqtamaý sebep bolǵan.
Eske sala keteıik, Ertis ózeni ústinde salynyp jatqan jańa kópirde ótken túnde de órt shyqqan.
Tótenshe jaǵdaı qyzmetkerleri keshegi jáne búgingi órttiń arasynda tikeleı baılanys joq ekenin aıtady. Keshegi órt kópirdiń №4 tireginde bolǵan.