Pavlodarda salynyp jatqan jańa kópir taǵy da otqa orandy
PAVLODAR. KAZINFORM — Tilsiz jaý kópir qurylysyndaǵy № 4 tirek mańaıyn sharpyǵan. Órt sóndirýshiler jalyn jalpy aýmaǵy 160 sharshy metr jerdi qamtyǵanyn habarlady.
Ertis ózeni ústinen salynyp jatqan jańa avtokópir qurylysynan taǵy da órt shyqty.
— Búgin Pavlodar oblysy tótenshe jaǵdaılar departamentiniń 101 pýltine salynyp jatqan kópirde órt shyqqany týraly habarlama tústi. Oqıǵa ornyna órt sóndirý bólimsheleri jedel túrde jetken sátte jylý oqshaýlaǵysh materıaldar men aǵash konstrýktsııalarynyń janǵany anyqtaldy. Órt № 4 tirek mańynda bolǵan, — dep málimdedi oblystyq tótenshe jaǵdaılar departamentinen.
Órt oshaǵy jer deńgeıinen shamamen 30 metr bıiktikte ornalasýy sebepti ony aýyzdyqtaý barysynda biraz qıyndyqtar týyndaǵan. Kúrdeli jaǵdaılarǵa qaramastan, órt sóndirýshiler jalyndy jedel túrde baqylaýǵa alyp, 160 sharshy metr aýmaqta qysqa merzimde tolyqtaı sóndirgen.
— Órttiń odan ári taralýyna jáne kópir qurylymyna jaıylýyna jol berilgen joq. Órttiń sebebi anyqtalyp jatyr, — dep habarlady departamentten.
Eske sala keteıik, Pavlodarda salynyp jatqan jańa kópirde bıyl qysta eki márte órt shyqqan edi. Onyń birinde aǵash qalyp pen jylý oqshaýlaǵysh materıaldar jansa, ekinshi jaǵdaıda qorǵanys shatyry men ózge de konstrýktsııalar otqa orandy.
Jańa kópirdiń aralyqtaryn qyrkúıek aıynda túıistirý josparlanyp otyr.
Nysan jyl sońynda paıdalanýǵa berilýi múmkin.
