Pavlodarda salynyp jatqan Ertis ózeni ústindegi kópirde órt shyqty

ASTANA. KAZINFORM – Pavlodar qalasynda salynyp jatqan Ertis ózeni ústindegi kópirde órt shyqty. Óńirlik tótenshe jaǵdaılar departamentiniń málimetinshe, aǵash qalyp pen jylý oqshaýlaǵysh materıaldar janǵan.

Órt týraly habar keshki ýaqytta túsken. Oqıǵa ornyna birneshe órt sóndirý eseptoby jiberildi. Qutqarýshylar jetken kezde qurylys nysanynda jylý oqshaýlaǵysh pen aǵash qalyp elementteriniń janyp jatqany anyqtalǵan.

– Jedel ári úılesimdi áreket ete otyryp, sondaı-aq órt oshaǵy jerden shamamen 30 metr bıiktikte ornalasqanyna qaramastan, órt sóndirýshiler jalyndy qysqa merzimde aýyzdyqtap, tolyqtaı sóndirdi, – dep habarlady Pavlodar oblysynyń Tótenshe jaǵdaılar departamenti.

Qutqarýshylardyń aıtýynsha, órttiń salynyp jatqan kópirdiń búkil qurylymyna taralýyna jol berilmegen.

Zardap shekkender joq. Órttiń shyǵý sebepteri keıinirek anyqtalady.

Buǵan deıin Aqsaı qalasynda turǵyn úıdegi órt saldarynan úsh adam kóz jumǵany habarlanǵan bolatyn.