Pavlodarda sábıler arasynda eńbekteýden ótken jarys jeńimpazdary anyqtaldy
ASTANA. QazAqparat - Pavlodardyń Jastar bastamalaryn damytý ortalyǵynda sábıler arasynda eńbekteýden ótken chempıonat óz máresine jetti, dep habarlaıdy QazAqparat tilshisi pavlodarnews.kz saıtyna silteme jasap.
Uıymdastyrýshylardyń derekterine qaraǵanda, chempıonat «Memlekettik jastar saıasaty týraly» Zańnyń aıasynda júzege asyrylǵan. Jas otbasylar arasyndaǵy otbasylyq qundylyqtardy keńinen nasıhattaý maqsatynda ótkizilgen sharaǵa shamamen 40 ótinim kelip túsken eken. Chempıonat erejesine sáıkes, jarys jolyna shyqqan sábılerdiń jas shamasy alty aılyqtan bastap bir jarym jasqa deıin bolsa, al olardyń ata-analarynyń jasy 35 jastan aspaýy tıis.
«Bul jas balaqandardyń barynsha belsendi eńbekteı bastaıtyn kezi sanalady. Eń bastysy - sábıdi qyzyqtyra bilý. Barlyǵy da balaǵa baılanysty, bireýleri tez eńbektese, endi biri baıaý qımyldaıdy, taǵy biri nazaryn basqa jaqqa aýdaryp jatady. Óte zeıindi sábıler de bar. Olar anasyna qaraıtyn bolsa, onda tek soǵan qarap, alǵa qaraı eńbekteıdi», - dedi Jastar bastamalaryn damytý ortalyǵynyń jetekshisi Ásııa Muqasheva.
Chempıonattyń «Alǵa baby» dep atalǵan birinshi kezeńinde sábıler 10 metrlik qashyqtyqqa eńbektep jarysqa tústi. Al ata-analarǵa balalaryn túrli oıynshyqtarǵa qyzyqtyryp, alǵa qaraı eńbekteýlerine shabyttandyrýǵa ruqsat berildi. Al ekinshi kezeń komandalyq jumys sanaldy. Onda búkil otbasy músheleri birge eńbektep, saıysqa tústi. Jarys qorytyndysynda úzdik tanylǵan sábıler men olardyń ata-analaryna baǵaly syılyqtar tartý etildi.
