Pavlodarda rýli oń jaqtaǵy jeńil kólikter jol apatyna jıi túsedi

PAVLODAR. KAZINFORM - Jyl basynan beri rýli oń jaqtaǵy kólikterge qatysty 11 jol oqıǵasy tirkelgen. Saldarynan 7 adam qaza taýyp, 20 adam túrli jaraqat alǵan.

QR Bas prokýratýrasy Quqyqtyq statıstıka jáne arnaıy esepke alý jónindegi komıtetiniń Pavlodar oblysy boıynsha departamentiniń bastyǵy Murat Qojamqulovtyń dereginshe, rýli oń jaqta ornalasqan kólik júrgizýshileriniń kinásinen 11 jol-kólik oqıǵasy tirkelip, onyń saldarynan 7 adam mert bolǵan, taǵy 20 adam jaraqattanǵan.

- Bizdiń departament taksı júrgizýshileriniń, onyń ishinde oń rýldi kólikterdiń kinásinen adamdardyń joldarda zardap shegýine alańdaýshylyq tanytyp otyr. QR «Avtomobıl kóligi týraly» zańynyń 7-babynyń 4-tarmaǵyna sáıkes, taksımen tasymaldaý úshin arnaýly, onyń ishinde tolyqtaı qolmen, rýli oń jaqtan basqarylatyn avtokólik quraldaryn paıdalanýǵa tyıym salynatynyn atap ótken jón. Qoldanystaǵy shekteýlerge qaramastan, jekelegen júrgizýshiler zańnyń bul normasyn elemeı, adamdardyń ómiri men densaýlyǵyna qaýip tóndirip otyr, - deıdi ol.

Máselen, bıylǵy 5 tamyzda «Atameken – Kýrchatov» tas jolynda «Toıota estıma» júrgizýshisi joldyń qarsy betine shyǵyp, «KamAZ» júk kóligimen betpe-bet soqtyǵysqan. Apat saldarynan jeńil kóliktiń júrgizýshisi men aldynda otyrǵan jolaýshy kóz jumǵan. Taǵy 5 jolaýshy ártúrli aýyrlyqtaǵy dene jaraqatyn alǵan.

Jalpy, bıyl Pavlodar oblysynyń aýmaǵynda ólim jaǵdaıyna soqtyrǵan 35 jol oqıǵasynda 54 adam qaza tapqan.

Eske sala keteıik, 23 qyrkúıek kúni Pavlodar — Qyzylorda tas jolynda júk kóligi men jeńil kólik soqtyǵysyp, apat saldarynan oqıǵa ornynda 4 jolaýshy men júrgizýshiniń mert bolǵanyn jazǵanbyz. Polıtseıler atalǵan jeńil kóliktiń rýli oń jaqta bolǵanyn aıtady. 

Al 3 qazan kúni «Toıota Alfard» Pavlodar mańynda jylqyǵa soǵylyp, eki adam qaza tapty.