Pavlodarda «Rýhanı jańǵyrý» kabıneti ashyldy
PAVLODAR. QazAqparat - Pavlodarda M.Kataev atyndaǵy oqýshylar saraıynda «Rýhanı jańǵyrý» kabınetiniń tusaýkeseri ótti, dep habarlaıdy pavlodarnews.kz.
Ashylý saltanatyna QR Din isteri jáne azamattyq qoǵam vıtse-mınıstri Abzal Núkenov, QR Bilim jáne ǵylym mınıstrligi bilim jáne ǵylym salasyndaǵy baqylaý komıtetiniń tóraǵasy Talǵat Eshenqulov, oblys ákiminiń orynbasary Meıram Begentaev jáne zııaly qaýym ókilderi qatysty. Abzal Núkenov ustazdar men balalardy «Rýhanı jańǵyrý» kabınetiniń ashylýymen quttyqtady.
"Pavlodar óńirinde osyndaı rýhanı ortalyqtyń ashylýy rýhanı jańǵyrýdyń mán-maǵynasyn, jastarymyzǵa durys jol tańdaýǵa, bolashaǵyn durys aıqyndaýǵa kómektesetin ortalyq bolatynyna senemin. Tyń bastamalaryńyz qutty bolsyn!", - dedi Abzal Núkenov.
Ardager ustazdardyń atynan «Ybraı Altynsarın» belgisiniń ıegeri, Nıkolaı Sılkın ataýly kabınettiń ashylýyna oraı bilim basqarmasyn quttyqtap, atalmysh ortalyq oblystaǵy oqý oryndarynda da osyndaı kabınetterdiń ashylýyna septigin tıgizedi degen úmitin jetkizdi. - Bul óte mańyzdy oqıǵa. Óıtkeni, adam balasy óz Otanynyń tarıhyn, týǵan tilin, memlekettiń qalyptasýyna úles qosqan tulǵalar jaıly bilmeı jatyp, óz eliniń laıyqty azamaty bola almaıdy, - dep atap ótti Nıkolaı Sılkın.
Oblystyq bilim berý basqarmasynyń basshysy Dinıslam Bolathanulynyń aıtýynsha, óńirdiń pedagogtary aldynda oqýshylar men stýdentterdi adamgershilik-patrıottyq tárbıeleýge erekshe kóńil bólý mindeti qoıylǵan. - Biz ashyq álemde básekege qabiletti, saıası mádenıetti tulǵany qalyptastyrý maqsatyn qoıamyz. Sonymen birge, óz Otanyn shyn máninde súıetin patrıotty tárbıeleımiz, - dep atap ótti ol.
«Rýhanı jańǵyrý» kabınetiniń jobasyn daıyndaý boıynsha jumys tobyna Bolathanulynyń basshylyǵymen oblystyń ǵalymdary men pedagogtary kirdi. Uıymdastyrýshylar týǵan ólkeniń biregeı tarıhyn, ataqty adamdardyń ómiri men qyzmetin zerdeleý boıynsha qajetti materıaldardy irikteý maqsatyn qoıdy. Osylaısha, Pavlodar óńiriniń týmalary uly jazýshy Buhar Jyraý, aǵartýshy jáne kóripkel Máshhúr Júsip Kópeev, asa kórnekti ǵalym Qanysh Sátbaev, talantty rejıser Sháken Aımanov álemge tanyldy.
«Ertis-Baıan óńiri - tarıhı tulǵalardyń týǵan jeri, qasıet daryǵan qutty meken. Mádenıetti, tarıhı estelikterdi zerdeleý boıynsha bul biregeı oryn - aýqymdy alań. Jas aıtyskerler men aqyndar arnaıy kabınettiń ashylýyna arnaǵan óz týyndylaryn oqydy. Qonaqtar úshin ekskýrsııany da balalardyń ózderi júrgizdi. Kabınette osy óńirden shyqqan ataqty tulǵalardyń portretteri men kitaptary bar stendter erekshe oryn alǵan. Bul Qazaqstannyń damýyna úles qosqan mádenıet jáne óner, ǵylym jáne saıası qaıratkerleri. Kelesi stendte - qazirgi zamandaǵy batyrlar, Táýelsizdik jyldary Qazaqstannyń damýyna eleýli úles qosqan naqty adamdar. Odan ári ornalasqan stendte - respýblıkalyq tizbege engen Pavlodar oblysynyń kıeli jerleri. Mysaly, Máshhúr Júsip Kópeev kesenesi, Isabek Ishannyń mavzoleıi, Qońyr áýlıe úńgiri, Jasybaı batyr monýmenti, orta ǵasyrdaǵy «Aqkól-Jaıylma» qala orny. Stendterdiń biri memlekettik tildiń qurylýyna, qazaq tiliniń latyn álipbıine kóshýine arnalǵan. Budan basqa, kabınette oqýshylarǵa oqýǵa usynylǵan QR-kodymen 100 kitaby bar vırtýaldy kitaphana jumys isteıdi. Pavlodar oblysynyń ǵalymdary, pedagogtary engen kitaptar tizimin saraptama keńesi bekitken. Munda tarıh, geografııa, qazaq tili jáne orys tili men ádebıeti, ózin-ózi taný, «Ólketaný» kýrsy, synyp saǵattar, dóńgelek ústelder, tanymdylyq sıpattaǵy is-sharalar ótkiziletin bolady.
