Pavlodarda reseılik azamattan 4 mln teńgeniń maınıng jabdyqtary tárkilendi

PAVLODAR. KAZINFORM — Kórshi eldiń azamaty ýákiletti organdardyń ruqsatynsyz maınıng jabdyqtaryn shetelge shyǵarmaqshy bolǵan. Taýar tárkilenip, sottyń sheshimimen oǵan 55 myń teńge mólsherde aıyppul salyndy.

Reseı Federatsııasynyń azamaty Qazaqstanda shamamen 4 mıllıon teńgege maınıng jabdyqtaryn satyp alyp, ony ýákiletti organdardyń lıtsenzııasyn almaı-aq shetelge shyǵarýǵa tyrysqan. Bul áreketi úshin jergilikti aýdandyq sot reseılik azamatty Ákimshilik quqyq buzýshylyq týraly kodekstiń 436-baby 1-bóligi boıynsha ákimshilik jazaǵa tartty. Odan maınıngtik jabdyqtar tárkilenip, oǵan 55 myń teńge aıyppul salyndy.

«Aıyppuldy tólegennen keıin quqyq buzýshy sot qaýlysynyń tárkileý týraly bóligine apellıatsııaǵa shaǵymdandy. Ol qaýlynyń kúshin joıyp, tárkilengen taýardy keri qaıtarýdy surap, oǵan tıisti lıtsenzııa alýǵa ýáde berdi. Oblystyq sot alqasy maınıng jabdyǵynyń eksporty ulttyq qaýipsizdik maqsatynda baqylanatyn ári eki maqsatta paıdalanylatyn erekshe taýarlarǵa jatatynyn, sondaı-aq reseılik jabdyqty tek eksportqa shyǵarý maqsatynda satyp alǵanyn nazarǵa ala otyryp, shaǵymdy qanaǵattandyrýsyz qaldyrdy», - dep habarlady Pavlodar oblystyq sotynyń baspasóz qyzmetinen.

Osylaısha apellıatsııalyq sot reseılikten maınıng jabdyqtaryn tárkileýdiń zańdylyǵyn rastady.

Eske sala keteıik, Qostanaı oblysynda 230 mln teńgeniń maınıng fermasyn shekaradan ótkizbek bolǵandar ustaldy.