Pavlodarda reseılik jol apatynyń shyǵynyn sot arqyly óndirdi
PAVLODAR. QazAqparat - Pavlodar oblysynda sottyń sheshimimen Ýspen aýdandyq ishki ister bóliminen reseıliktiń paıdasyna 407 myń 370 teńge zalal óndirildi, dep habarlaıdy «QazAqparat» HAA tilshisi.
«2017 jyldyń 29 sáýirinde Ýspenka-Qozyketken tasjolynda bolǵan jol-kólik apaty kezinde Reseı azamatyna zalal keltirgen», - dep habarlady Pavlodar oblystyq sotynyń baspasóz hatshysy Aıgerim Súleımenova.
Ýchaskelik ınspektor mas kúıde «VAZ-21213» markaly qyzmettik kólikti júrgize otyryp, qarsy jolaqqa shyǵyp ketken jáne Pavlodardan Novosibirge ketip bara jatqan reıstik avtobýstyń búıirinen soqqan. Avtobýstaǵy jolaýshylar zardap shekpegen.
Ýspen aýdandyq sotynyń aqparaty boıynsha, osy oqıǵadan keıin polıtsııa qyzmetkerin jumystan bosatyp, bes jylǵa júrgizýshi kýáliginen aıyrǵan. Al aýdandyq ІІB Reseı azamatyna keltirilgen zalaldy óteıtin bolady.
