Pavlodarda pýblıtsıst, qoǵam qaıratkeri Sádýaqas Shormanovtyń 175 jyldyǵyna oraı kitap jaryq kórdi
PAVLODAR. KAZINFORM - Kitapqa Sádýaqas Shormanovtyń 1907 jyly Qazan qalasynda basylyp shyqqan «Aýshy» atty zertteý eńbegi, Reseıdiń Sankt-Peterbýrg qalasynyń muraǵattarynda saqtalǵan «Basshy» qoljazbasy jáne sol tustaǵy merzimdi basylymdarda jaryq kórgen maqalalary berilgen.
Sádýaqas Shormanov – ǵasyrlar toǵysyndaǵy qazaq zııalylarynyń ishindegi ozyq oıly ókilderiniń biri. Ol patsha úkimetiniń otarshyldyq saıasatyna qarsy turyp, qazaq halqynyń múddesin qorǵady. Ásirese, jer máselesinde onyń ustanymy aıqyn boldy. 1905 jylǵy patsha manıfesinen keıin Qazaqstandaǵy ult-azattyq qozǵalystyń bastaýynda turǵan Alash qaıratkerlerimen tyǵyz baılanys ornatqan.
Tulǵanyń qazaq pýblıtsıstıkasyna qosqan úlesi zor. Onyń negizgi eńbekteriniń biri – «Aýshy» atty shyǵarmasy. Bul eńbek onyń ańshylyq ónerge degen tereń bilimin, tabıǵatqa degen súıispenshiligin jáne qazaq halqynyń dástúrli ańshylyq mádenıetin sıpattaıdy. Ol bul kitaby arqyly qazaq ańshylyqtaný ǵylymynyń negizin salǵanyn ekiniń biri bile bermeıdi. Al kóptegen maqalasy qazaq jýrnalıstıkasynyń qarlyǵashy bolǵan «Dala ýalaıaty», «Aıqap», «Qazaq» gazetterinde jaryq kórgen. Baspasóz betterinde óz zamanynyń ózekti máselelerin, atap aıtqanda, jer máselesi, bilim berý, halyqtyń áleýmettik jaǵdaıy sııaqty taqyryptardy kóterdi.
Kitap qurastyrýshylary - Á.Marǵulan atyndaǵy Pavlodar pedagogıkalyq ýnıversıtetiniń dotsenti, fılologııa ǵylymdarynyń kandıdaty Ádilbek Ámirenov jáne Buqar jyraý atyndaǵy ádebıet jáne óner mýzeıiniń qyzmetkeri Janbolat Abaıhan.
Bıyl tulǵanyń týǵanyna 175 jyl tolyp otyr.
Buǵan deıin biz akademık Qanysh Sátbaev batasyn alǵan «Sáken aǵaıdyń» kim ekeni týraly jazǵan edik.