Pavlodarda prokýratýra qyzmetkerine qatysty alaıaqtyq faktisi boıynsha tergeý júrip jatyr
PAVLODAR. KAZINFORM – Pavlodar turǵynynyń aryzy negizinde óńirlik UQK departamenti men prokýratýranyń ishki qaýipsizdik bólimi birlesip, prokýratýra qyzmetkerine qatysty alaıaqtyq deregi boıynsha jedel-tergeý is-sharalaryn júrgizdi.
Bas prokýratýranyń málimetinshe, tekserý is-sharalary prokýratýra organdarynyń ishki qaýipsizdik bólimshesi jáne UQK departamentimen birge júzege asqan. Oǵan qadaǵalaýshy organ qyzmetkeriniń alaıaqtyqqa qatysy bolýy múmkin degen shaǵym negiz bolǵan.
— Qazirgi ýaqytta tergeý amaldary jalǵasýda. Qazaqstan Respýblıkasynyń Qylmystyq-protsestik kodeksiniń 201-babyna sáıkes ózge aqparat jarııa etýge jatpaıdy, — dep jazdy Bas prokýratýradan.
Eske salaıyq, buǵan deıin Almaty áýejaıynda Aqtaý qalasynyń prokýrory Erbolat Ábdilov ustalǵan bolatyn.
Keıin sot onyń isin toqtatty.