Pavlodarda probatsııa qyzmetiniń burynǵy ınspektory para alǵany úshin 12 mln teńge aıyppul arqalady
PAVLODAR. KAZINFORM - Probatsııa qyzmetiniń burynǵy ınspektory sottalǵan azamattan 400 myń teńge para alǵany úshin 12 mln teńge aıyppul tóleýge mindetteldi. Bul týraly Pavlodar qalasynyń qylmystyq ister jónindegi aýdanaralyq sotynyń úkiminde aıtylǵan.
Іs materıaldaryna súıensek, Pavlodar qalasynyń turǵyny alaıaqtyq jasaǵany úshin bas bostandyǵyn shekteý jazasyna kesilgen. Osyǵan baılanysty ol probatsııa qyzmetine esepke alynyp, sot júktegen shekteýlerdi saqtaýǵa mindetti bolǵan.
Alaıda 2026 jylǵy tamyzda sottalǵan azamat júrgizýshi kýáliginsiz kólik basqarǵan. Polıtsııa ony toqtatyp, ákimshilik hattama toltyrǵan. Onyń tártibin baqylaýǵa mindetti probatsııa ınspektory bul quqyq buzýshylyqqa baılanysty tıisti shara qabyldamaǵan.
Arada eki apta ótkende er adam kólikti mas kúıinde basqarǵany úshin qaıta ustalǵan. Sot sheshimimen ol 15 táýlikke ákimshilik qamaqqa alynǵan.
Jazasyn ótep shyqqannan keıin kezekti tirkeýge kelgen azamattan 39 jastaǵy probatsııa ınspektory 400 myń teńge talap etken. Ol bul aqshany sottalǵan adamnyń zańbuzýshylyqtary týraly eskertý jasamaǵany jáne jazanyń ótelmegen bóligin bas bostandyǵynan aıyrýǵa aýystyrý týraly sotqa usynys engizbegeni úshin suraǵan.
Inspektor aqshany sol kúni berýdi talap etken. Al sottalýshy kelisilgen somany birneshe kúnnen keıin jetkizgen. Aqshany alǵan sátte qyzmetker ustaldy.
Sotta qaralǵan qylmystyq is boıynsha eks-ınspektor kinásin moıyndap, bas bostandyǵynan aıyrý jazasyn taǵaıyndamaýdy suraǵan.
Sot oǵan 12 mln teńge kóleminde aıyppul salý týraly úkim shyǵardy.
Eske sala keteıik, Pavlodarlyq kásipker óz qyzmetkerleriniń kartalary arqyly 100 mln teńgeden astam zańsyz aýdarym jasaǵan.
