Pavlodarda polıtseıler qala turǵynynyń 2 mln teńgesin alaıaqtardan saqtap qaldy
PAVLODAR. KAZINFORM - Oblys ortalyǵynda patrýldik polıtsııa qyzmetkerleri ınternet-alaıaqtardyń arbaýyna túsken turǵynnyń 2 mln teńgeni aýdarýyna jol bermedi.
Óńirlik polıtsııa departamentiniń dereginshe, polıtsııa batalonynyń qyzmetkerleri kósheni patrýldeý kezinde jylap kele jatqan qyzdy baıqap, mán-jaı surasady. Qala turǵyny belgisiz adamdardyń talabymen 2 mln teńgeni bank shotyna aýdarýǵa bara jatqanyn aıtqan.
Kapıtan Darhan Maqajanov pen kapıtan Elaman Kárimov qyzben sóılese kele, onyń alaıaqtardyń yqpalyna túskenin anyqtaıdy.
- Jábirlenýshiniń aıtýynsha, aldymen belgisiz adam telefon shalyp, SIM-kartanyń qoldanylý merzimin uzartý úshin SMS-kodty jiberýdi suraǵan. Keıin onyń nómiri arqyly eki shot ashylyp, sol shottarǵa alaıaqtyq jolmen aqsha aýdarylyp jatqany aıtylǵan. Budan soń qońyraý shalýshylar qyzǵa jınaǵan qarajatynyń zańdy ekenin dáleldeýdi talap etken. Bolman jaǵdaıda bas bostandyǵynan aıyrylýy múmkin ekenin aıtyp qorqytqan, - dep málimdedi departamentten.
Psıhologııalyq qysymǵa ushyraǵan turǵyn úıinen shyǵyp, barlyq jınaǵan aqshasyn belgisiz adamdar kórsetken shotqa aýdarmaq bolǵan.
Polıtseıler dereý tekserý júrgizip, bank uıymdarymen baılanysqan. Nátıjesinde qyzdyń atyna eshqandaı kredıttik mindetteme rásimdelmegeni anyqtaldy. Sonymen qatar quqyq qorǵaý qyzmetkerleri onyń kelisimimen eGov Mobile qosymshasy arqyly «Stop-kredıt» qyzmetin qosýǵa kómektesti.
Polıtsııa departamentiniń málimetinshe, óńirde ınternet-alaıaqtyqtyń 1337 faktisi tirkelgen.
«Anti-fraud» jáne «Hi-Tech» jedel-profılaktıkalyq is-sharalary aıasynda SIM-kartalardy zańsyz iske qosýmen jáne aqshany qolma-qol aqshaǵa aınaldyrýmen aınalysqan adamdar ustaldy. Zańsyz aınalymnan 120-dan astam mobıldi qurylǵy, 500 abonenttik SIM-karta, 39 bank kartasy jáne eki SIM-box qurylǵysy tárkilendi.
Jalpy, ınternet-alaıaqtyqqa qatysy bar degen kúdikpen 33 adam ustaldy. Olardyń úsheýi – kámeletke tolmaǵandar.
Polıtsııa kúmándi shottarǵa aqsha aýdarmaýǵa jáne alaıaqtyq belgileri baıqalǵan jaǵdaıda dereý quqyq qorǵaý organdaryna habarlaýǵa shaqyrady.
Eske sala keteıik, alaıaqtar qazaqstandyqtarǵa zeınetaqy jınaqtaryn qolma-qol aqshaǵa aınaldyrýdy usyna bastady.