Pavlodarda polıtseı zeınetkerdi alaıaqtardan qutqaryp qaldy
ASTANA.KAZINFORM - Pavlodar qalasynda saýda ortalyǵyna barǵan zeınetker telefon alaıaqtarynyń arbaýyna túsip, óz jınaǵynan aıyrylyp qala jazdady. Qaskóılerdiń psıhologııalyq qysymyna sengen ol 4 mln teńgesin «qaýipsiz shotqa» aýdarmaq bolǵan, - dep habarlaıdy Polisia.kz.
Alaıaqtar alǵashqy qońyraý kezinde ózderin medıtsınalyq mekeme qyzmetkerleri retinde tanystyryp, tekserýden ótý syltaýymen SMS-kodty ataýyn suraǵan. Qaýipti sezbegen zeınetker qajetti málimetterdi aıtyp qoıǵan.
Keıinnen olar «qaýipsizdik qyzmeti» retinde qaıta habarlasyp, onyń bank shottaryna qaýip tónip turǵanyn alǵa tartyp, barlyq qarajatyn dereý basqa shotqa aýdarýǵa kóndirgen. Qatty alańdaǵan zeınetker esepshotynan 4 mln teńge sheship alyp, Batyr Mall saýda ortalyǵyna barǵan. Alaıaqtar onymen telefon arqyly baılanysyn úzbeı, ár qadamyn baqylap otyrǵan.
Alaıda qylmys ІІM oqý ortalyǵynyń qyzmetkeri Saltanat Karımovanyń qyraǵylyǵynyń arqasynda kesildi. Egde jastaǵy azamattyń minez-qulqyndaǵy kúmándi áreketterdi baıqaǵan ol dereý polıtsııa shaqyryp, zeınetkerdi aqshany aýdarýdan saqtap qalýǵa tyrysqan.
— Osyndaı sátterde beıjaı qalmaı, kúmándi jaǵdaıdy baıqasań, dereý áreket etý óte mańyzdy. Sol sátte men tek adamnyń qaýipsizdigin qamtamasyz etýdi jón sanadym, — dedi Saltanat Karımova.
Polıtseılerdiń jedel áreketi men qyzmetkerdiń qyraǵylyǵynyń arqasynda zeınetker óz qarajatyn saqtap qaldy, al alaıaqtar qylmystyq nıetin júzege asyra almady.
ІІM azamattardy taǵy da eskertedi: bank, quqyq qorǵaý organdary, medıtsınalyq mekemeler jáne ózge de resmı qurylymdar telefon arqyly aqsha aýdarýdy, SMS-kodtardy aıtýdy nemese jeke derekterdi berýdi talap etpeıdi. Alaıaqtardyń bir ǵana qońyraýy adamnyń ómir boıǵy jınaǵyn joǵaltýyna sebep bolýy múmkin. Sondyqtan kúmándi qońyraýlarǵa senbeı, árqashan resmı arnalar arqyly tekserý qajet.
Aıta keteıik, Bas prokýratýra alaıaqtardy anyqtaýǵa jasandy ıntellektini iske qosty.
