Pavlodarda polıtsııa qyzmetkeri atyn jamylǵan alaıaq quryqtaldy
ASTANA. Mamyrdyń 26-sy. QazAqparat /Marlan Jıembaı/ - Pavlodarda polıtsııa qyzmetkeri atyn jamylǵan alaıaq quryqtaldy. Bul týraly búgin QR Іshki ister mınıstrliginiń Til saıasaty jáne aqparat departamentiniń bastyǵy Qýanyshbek Jumanov málim etti.
Onyń atap ótýinshe, Pavlodarda oblystyq ІІD ózindik qaýipsizdik qyzmetkerleri arnaıy operatsııasy júrgizý barysynda Taraz qalasynyń eki azamatyn tutqyndaǵan. Olardyń biri ózin QR ІІM Ózindik qaýipsizdik departamentiniń qyzmetkerimin dep tanystyryp, Pavlodar men Qaraǵandy qalasynyń turǵyndaryna qatysty birqatar alaıaqtyq jasaǵan.
«Olardyń birinde maıor shenindegi polıtsııa kıimi men qyzmettik kýáligi bolǵan. Al ekinshisi ózin Semeı qalasynyń tuǵrynymyn dep tanystyrǵan», dedi ol.
QR ІІM ókiliniń sózine qaraǵanda ustalǵandardyń biri Pavlodar qalasynyń turǵynyn aldap, onyń Nıssan-Maksıma kóligin ıemdengen jáne kólikti 2500 dollarǵa satyp, aqshasyn qaltasyna basqan. Al taǵy bir turǵynǵa ózin ÓQD qyzmetkerimen dep tanystyryp, júrgizýshi kýáligin qalpyna keltirý úshin 75 myń teńge alǵan. Sonymen qatar oǵan Qaraǵandy qalasy turǵynynyń 2 mln. 350 teńge aqshasyn urlady degen kúdik keltirilip otyr.
«Almaty qalasynyń ІІD bul «jalǵan polıtseıge» alaıaqtyq jasaǵany úshin ótken jyldyń qazan aıynda izdeý jarııalasa, onyń sybaılasy Jambyl oblysynda buzaqylyq jasaǵany úshin aǵymdaǵy jyldyń aqpan aıynan beri memleketaralyq izdestirýde bolǵan», dep atap ótken Q.Jumanov qazirgi ýaqytta ustalǵan azamattardyń basqa da qylmystarǵa qatysynyń bar-joǵy tekserilip jatqandyǵyn aıtty.
