Pavlodarda polıtsııa qysta tabylǵan sábıdiń ata-anasyn izdep jatyr
PAVLODAR. QazAqparat - Polıtsııa qańtar aıynda Pavlodardaǵy qoqys jáshiginiń janynan tabylǵan 7-12 kúndik sábıdiń ata-anasyn izdep jatyr, dep habarlaıdy QazAqparat tilshisi.
«Sábı týys ne tanystaryńyzdyń biriniń balasy ekenin bilseńizder, nemese balanyń anasy týraly qandaı da bir aqparattaryńyz bolsa 8-(7182)-39-15-08 nómirine, WhatsApp-tan: 8-701-014-8-014 nómirine habarlasýlaryńyzdy suraımyz. Aqparat qupııa bolady», - dep málimdedi búgin Pavlodar oblystyq polıtsııa departamenti óńir turǵyndary men qonaqtaryna.
Vedomstvonyń bergen málimetterine qaraǵanda, 2018 jylǵy 29 qańtar kúni 19.45 shamasynda Pavlodardyń Gagarın kóshesindegi 40-úıdiń aýlasyndaǵy qoqys jáshiginiń janynan túri azııalyqqa keletin, 7-12 kúndik sábı tabylǵan. 
«Bala qazirgi kezde «Pavlodar oblystyq mamandandyrylǵan balalar úıi» memlekettik mekemesinde, onyń jaǵdaıy jaqsy», - deıdi departament qyzmetkerleri.
Jýyrda ǵana Pavlodar oblysynda qoqys jáshiginiń janynan sábıdiń denesi tabylǵandyǵy týraly habar taraǵan bolatyn.
Foto: Pavlodar oblysynyń polıtsııa departamenti
