Pavlodarda plastıkalyq qaldyqtardy jınaıtyn jáshikter qoıylady
PAVLODAR. QazAqparat - Pavlodar oblysy ortalyǵynda plastmassa qoqystardy jınaıtyn 400 konteınerdiń 147-si ornatylǵan, dep habarlaıdy pavlodarnews.kz.
Oblys ákimdiginde ekologııa máseleleri jóninde ótken jıynda konteınerler Pavlodarda memlekettik uıymdarda, birneshe aýlalar men saıabaqtarda ornalastyrylǵany belgili boldy. Mysaly, jaǵalaýda - alty, qalalyq saıabaqta - tórt jáne Gagarın saıabaǵynda eki konteıner ornatylǵan.
Sheneýnikterdiń aıtýynsha, jáshiktegi qoqys aptasyna úsh ret shyǵarylady. Konteınerlerde aıyna 30 tonnaǵa deıin plastıkalyq qaldyq jınalady.
«Іriktelgen plastıkalyq qaldyqtar ekinshi rettik shıkizat retinde paıdalanylady. Olardan juqartylyp, untaqtar men polıetılen qaptary alynady», - dedi óńirlik jer qoınaýyn paıdalaný, qorshaǵan orta jáne sý resýrstary basqarmasynyń basshysy Qadyljan Satıev.
Oblys ákimi plastıkterdi ǵana emes, ekinshi ret paıdalanýǵa múmkindik beretin qurylys qaldyqtaryn da jeke jınaý kerektigin atap ótti.
«Jol qurylysy kezinde astyn toltyratyn zat izdep qalamyz- Al qurylys qaldyqtaryn osy baǵytta qoldanýǵa bolady. Búginde qurylys qaldyqtary kez kelgen jerge shyǵarylýda. Tipti, jaıylymdarǵa da tógilýde. Sondyqtan kerek kezde paıdalaný úshin qurylys qoqystaryn jeke jınaıyq», - dedi Pavlodar oblysynyń ákimi Bolat Baqaýov.
Kezdesýde qatty turmystyq qaldyqtar polıgonynyń qurylysy da sóz boldy.
Jer qoınaýyn paıdalaný basqarmasy basshysynyń aıtýynsha, barlyq aýylǵa polıgon salý óte qymbat. 345 polıgonǵa 52 mıllıard teńgeden astam qarjy kerek. Sondyqtan sheneýnikter turmystyq qaldyqtardyń polıgony boıynsha kishi, ortasha, úlken eldi mekenderge arnalǵan jobalar jasaý kerek dep sheshti. Bul jobalardy qurastyrýǵa jumsalatyn bıýdjettik shyǵyndy qysqartýǵa múmkindik beredi. Qazirgi ýaqytta qurylys isteri jónindegi komıtet pen TÚKSh 2019 jylǵa jobalardy qurastyrýǵa arnalǵan bıýdjettik ótinishterin daıyndaýda.
