Pavlodarda pırotehnıka saýdasyna qarsy kúres júrgizilip jatyr

ASTANA. QazAqparat - Pavlodarda 1 mıllıon teńgeniń pırotehnıkalyq zattary tárkilendi. Óıtkeni satýshylardyń arnaıy ruqsat qaǵazy joq. Endi olar 5 aılyq eseptik kórsetkish kóleminde aıyppul tóleıdi, dep jazady «Habar 24».

«Pırotehnıka - 2016» aldyn alý sharasy barysynda onnan astam irili-usaqty saýda orny tekserildi. Olardyń kópshiliginde otshashýlardy saqtaý erejesi buzylǵan.

«Reıdti ótkizýdegi maqsat - órt qaýipsizdigi men azamattardyń qaýipsizdigin saqtaý. Lıtsenzııasy joq ónimderdi satatyndar ádette órt qaýipsizdigin saqtamaıdy. Pırotehnıka ónimderi tekserilmeı, zańsyz satylsa, órt oqıǵalary bolýy múmkin», - deıdi Qalalyq TJB memlekettik órtti baqylaý bóliminiń bastyǵy Qaırat Shaımardenov.

Zań talabyna saı Jańa jyl nyshandary arnaıy lıtsenzııamen mamandandyrylǵan saýda oryndarynda satylýy tıis. Jedel aldyn alý sharasy jeltoqsannyń aıaǵyna deıin jalǵasady. Al tárkilengen ónim tolyq joıylady.