Pavlodarda patrýl polıtseıleri jaǵalaýdy elektrmobılmen kúzetedi
PAVLODAR. QazAqparat - Pavlodarlyq polıtseıler elektrmobılmen jaǵalaýdy patrýldeıdi, dep habarlaıdy QazAqparat oblystyq polıtsııa departamentiniń baspasóz qyzmetine silteme jasap.
Pavlodar qalasynyń ortalyq jaǵalaýynda demalýshy azamattardyń qaýipsizdigin qamtamasyz etý maqsatynda pavlodarlyqtardyń eń tanymal demalys oryndarynyń birin patrýldeý úshin quqyqtyq tártip saqshylary elektromobıldi paıdalanady.
«Qala turǵyndary men qonaqtarynyń súıikti demalys ornynda jaz kezinde kún saıyn buqaralyq is-sharalar ótedi. «Ertis promenadta» jáne «Otan promenadta» sheteldik jáne otandyq estrada juldyzdary óner kórsetedi, chelendj, fleshmobtar, túrli aýqymdy aktsııalar ótkiziledi. Qoǵamdyq tártipti saqtaý boıynsha qyzmetti tıimdi atqarý úshin endi elektrmobılder múmkindigin paıdalanamyz», - dep atap ótti oblystyq departamenttiń bastyǵy, general Amantaı Áýbákirov.
Endi polıtsııa departamentiniń qaramaǵynda elektr jetegi bar 2 jańa elektrmobıl bar. Bul ekologııalyq taza jáne únemdi kólik, benzınge shyǵyn shyqpaıdy. Qazirgi zamanǵy elektrmobıl tórt adamǵa eseptelgen, sondaı-aq onyń eki orny jolaýshylardy tasymaldaýǵa arnalǵan.
Elektrmobıldiń jyldamdyǵy - saǵatyna 30 km deıin, qozǵalys qory - 100 km. Ol ádettegi toq qýatymen qýattalady jáne shý shyǵarmaı tynysh júredi, bul patrýldeý úshin óte mańyzdy.
