Pavlodarda páter órtenip, zeınetker kóz jumdy
PAVLODAR. KAZINFORM - Kópqabatty turǵyn úıde ornalasqan páterde úı zattary, jıhaz ben aǵash eden órtengen. Ózge páterlerdiń turǵyndary dalaǵa óz betimen shyqqan.
Bul týraly Pavlodar oblysy Tótenshe jaǵdaılar departamentiniń baspasóz qyzmetinen habarlady.
- 23 jeltoqsan kúni saǵat 04.49-da Pavlodar qalasyndaǵy Ryleev kóshesinde ornalasqan kópqabatty úıde órt shyqqandyǵy týraly habarlama kelip tústi. Oqıǵa ornyna jetken órt sóndirýshiler úsh bólmeli páterde úı zattary, jıhazdar men aǵash edenniń janyp jatqanyn anyqtaǵan. Órttiń aýmaǵy 4 sharshy metr boldy. Órt ornynan 17 eresek jáne 3 bala óz betinshe evakýatsııalandy. Órt sóndirýshilerdiń súıemeldeýimen taǵy úsh turǵyn dalaǵa shyǵaryldy, - dep málimdedi departamentten.
Órtti sóndirý barysynda qutqarýshylar otqa oranǵan páterden 1959 jyly týǵan er adamnyń denesin tapqan.
Tilsiz jaýdy sóndirýge tótenshe jaǵdaı departamentiniń kúshteri men quraldary tartyldy. Oqıǵanyń sebep-saldary anyqtalyp jatyr.
Eske sala keteıik, Pavlodarda 34 jastaǵy áıel ıis tıip kóz jumdy.