Pavlodarda páter órtenip, segiz adam zardap shekti
ASTANA. QazAqparat - Pavlodarda segiz adam órtten zardap shekti. Turǵyndar órtengen zattardyń ıisinen ýlanyp qalǵan, dep habarlaıdy pavlodarnews.kz.
Jedel járdem stantsııasyna shaqyrtý keshe túnde saǵat 22.38-de "Sıbırskaıa kóshesi, 89" mekenjaıy boıynsha ornalasqan úıden túsken. Ekinshi podezdiń ekinshi qabatynda páter janǵan. Oqıǵa ornyna dereý jedel járdem jáne medıtsınalyq apattar brıgadasy jetti.
«Orta dárejedegi ýlaný dıagnozymen bala kezinen sal aýrýyna shaldyqqan 43 jastaǵy er adam №1 qalalyq aýrýhanaǵa jetkizildi. 71 jastary zeınetker orta dárejede ýlanyp, №3 aýrýhanaǵa jatqyzyldy», - deıdi oblystyq densaýlyq saqtaý basqarmasynyń baspasóz hatshysy Elmıra Temirgalıeva.
Sondaı-aq, orta dárejede 48 jastaǵy er adam, 16 jáne 18 jastaǵy boıjetkender, 12 jastaǵy jasóspirim ýlanǵan. Olardyń barlyǵy aýrýhanaǵa barýdan bas tartqan. Tek 72 jastaǵy qarııada kúızelis reaktsııasy anyqtalǵan.
Tilsiz jaý 15 sharshy metr aýmaqty sharpyǵan. Órt sóndirýshiler 58 adamdy qutqardy. Olardyń 17-si - bala.
Oqıǵa ornyna TJD-den 37 adam, jedel qutqarý jasaǵynan bes adam men 10 tehnıka shyqty. Aldyn ala boljam boıynsha, elektr symdarynyń tuıyqtalýy órttiń shyǵýyna sebep bolǵan. Órt saǵat 23.36-da tolyǵymen sóndirildi.
