Pavlodarda ózge ult ókilderi qazaqsha án salatyn jańa joba bastaldy
PAVLODAR. KAZINFORM — Pavlodar qalasyndaǵy «Dostyq úıinde» oblystyq Qazaqstan halqy Assambleıasynyń etnomádenı birlestikteri arasynda «Qazaqsha án salamyz» festıvali bastaldy. Ózge ult ókilderi el aýzyndaǵy tanymal ánderdi tamyljyta shyrqap, halqymyzdyń ánshilik mádenıetin jaqynnan tanı tústi.
«Qazaqsha án salamyz» festıvaliniń alǵashqy jobasy óńirdegi barlyq etnomádenı birlestikterdiń basyn qosty. Jalpy sany 60-tan astam qatysýshy óner kórsetip, qazaqtyń tanymal ánderin oryndady. Festıvaldiń aty aıtyp turǵanda, munda tek ózge ult ókilderi qazaq tilindegi ánderdi shyrqady. Áýeli qatysýshylar jerebe tartysyp, «Asyl áýen», «Shalqyma», «Syrly saz», «Dýdar-aı» toptaryna bólindi. Al mádenı is-sharanyń ózi «halyq ánderi», «qazaq kompozıtorlarynyń ánderi», «zamanaýı ánder» degen úsh kezeńnen turdy.
— «Qazaqsha án salaıyq» jobasy Pavlodar oblysy ákiminiń tapsyrmasy boıynsha tuńǵysh ret oblystyq Assambleıada ótkizilip otyr. Joba maqsaty — jastar arasynda qazaq mádenıetine degen qurmet sezimin tárbıeleý, ózge etnos ókilderi arasynda rýhanı birlik pen ultaralyq kelisim ıdeıalaryn taratý, memlekettik tildiń damýyna yqpal etý. Bul arqyly qazaqtyń mádenı qundylyqtary ulyqtalady. Etnomádenı birlestikterdiń ókilderi qazaqsha án shyrqap, rýhanı ónerimizben tanysady. Bul joba óńirde alǵash ret uıymdastyryldy. Aldaǵy Respýblıka kúninde ózgeshe formatta ótkizemiz dep josparlap otyrmyz, — deıdi «Qoǵamdyq kelisim» mekemesiniń basshysy Núrııa Kóbenova.
Qatysýshylar jerebe tańdap, ózderińe berilgen ánderdi oryndady. Olardyń qatarynda «Ana», «Ustazym», «Sarjaılaý», «Armandastar», «Bir bala» týyndylary bar.
Eske sala keteıik, Pavlodarda 100 jas dombyrashy «Orteke» kúıin shertip, Gınnestiń rekordtar kitabyna endi.
