Pavlodarda Ózbekstannyń 42 azamatyn zańsyz jaldaǵan kásipkerge aıyppul salyndy
ASTANA. QazAqparat - Polıtsııa qyzmetkerleri Ózbekstan Respýblıkasynyń 42 azamatyn qalanyń bir saýda úıiniń dúńgirsheginde júk tıeýshi retinde jumysqa jaldaǵan jeke kásipkerdi anyqtady, dep habarlaıdy pavlodarnews.kz.
«QR azamatshasynyń sheteldikterdi eńbekke tartý úshin jergilikti atqarý organynyń ruqsaty bolmaǵan. Atalmysh fakti boıynsha áıel adam QR ÁQBK 519-babyna sáıkes ákimshilik jaýapkershilikke tartylyp, oǵan 126 250 teńge somasynda aıyppul salyndy»,- deıdi oblystyq polıtsııa departamentiniń baspasóz qyzmetinde.
Reıd barysynda oblys aýmaǵynda Qazaqstan Respýblıkasynda bolý erejesin buzǵan 353 shetel azamat anyqtalyp, ákimshilik jaýapkershilikke tartyldy. Sotqa 125 ákimshilik materıal joldandy. Olardy qaraý nátıjeleri boıynsha TMD elderiniń 24 azamatyna qatysty elden shyǵarý jóninde sheshim qabyldandy. Bizdiń elde bolý erejesin buzǵandary úshin jaqyn shet elden kelgen 275 azamatqa Qazaqstan Respýblıkasynda ýaqytsha bolý merzimi qysqartyldy. Shetel jumys kúshin zańsyz paıdalanǵan 15 jaıt anyqtaldy. Sheteldiktermen Qazaqstan Respýblıkasynda bolý erejesin saqtaýdy qamtamasyz etpegenderi úshin QR ÁQBK 519-babyna sáıkes QR 71 azamaty ákimshilik jaýapkershilikke tartyldy.
