Pavlodarda ótken aralas jekpe-jek jarysynan túsken qarjy syrqat balalardy emdeýge jumsalady
Jarysqa Brazılııa, Lıtva, Ýkraına, Reseı, Qyrǵyzstan, Tájikstan jáne Qazaqstan elderinen 24 sportshy qatysty. On eki jekpe-jekke turatyn jarys bes saǵatqa sozyldy.
Keshtiń basty jekpe-jegi pavlodarlyq Fanıl Rafıkov pen brazılııalyq Joze Markýs Santıagonyń arasynda boldy. Ádil qazylar alqasynyń sheshimimen Fanıl Rafıkov jeńiske jetti.
Pavlodarlyq batyrdy qala ákimi Bolat Baqaýov marapattady. Pavlodardaǵy «Ahmat» kásipqoı sport klýbynyń prezıdenti Sultan Ichıevtyń aıtýynsha, bıletten 800 myń teńge jınalǵan.
«Bıletten túsken qarjyǵa 200 myń teńgeni óz atymyzdan qosyp, jalpy somasy bir mıllıon teńgeni eki balanyń emdelýine bólip berdik. Olar sal aýrýyna shaldyqqan 2002 jyly týǵan Danııl Shefner men 2006 jyly týǵan Álisher Amanolla. Danıılge dárigerler leıkodıstrofııa dıagnozyn qoıǵan, al Álisherde orta deńgeıli spastıkalyq dıplegııa. Bul bizdiń klýbtyń halyqaralyq týrnırden jasaǵan alǵashqy qaıyrymdylyq sharasy», - dedi S. Ichıev.
Sondaı-aq Sultan Ichıevtyń atap ótkendeı, shet elden kelgen sportshylar Pavlodarda Naýryz merekesin toılaǵan. «Ulys kúni qonaqtarymyzǵa qatty unady. Brazılııalyqtar qazaqsha etten aýyz tıdi, olar budan keremet asty jep kórmegenderin aıtty», deıdi bapker.
«Batyr mall» ortalyǵynda ótken MMA aralas jekpe-jek boıynsha «Qaharly kúres-17» halyqaralyq týrnırin 1000-ǵa jýyq adam tamashalady. Atalmysh týrnır «Boets» telearnasynan kórsetiledi.