Pavlodarda otqa oranǵan dúkennen 27 adam shyǵaryldy
ASTANA. QazAqparat - Pavlodarda Qamzın kóshesi, 160 mekenjaıy boıyndaǵy kóp qabatty turǵyn úıdiń birinshi qabatynda ornalasqan aıaq kıim dúkeni órtendi.
Oblystyq TJD-niń málimetinshe, saýda núktesindegi áıelder sómkeleri men aıaq kıimder turǵan sóreler otqa oranyp, qyzyl jalyn úsh sharshy metr aýmaqty sharpyǵan, dep habarlaıdy pavlodarnews.kz .
Órt shyqqany týraly habarlama keshe saǵat 19.44-te kezekshilik bólimine túsken. Saǵat 20.44-te tolyǵymen sóndirilgen. - Oqıǵa ornynan 27 adam syrtqa shyǵaryldy. Onyń segizi - balalar. Dúken "Razgon" jeke kásipkerligine tıesili. Tilsiz jaýdy aýyzdyqtaýǵa departamentten eki bólimshe jumyldyryldy. Zardap shekkender joq. Qazirgi tańda órttiń shyǵý saldary men keltirilgen shyǵyn kólemi anyqtalýda, - dedi baspasóz qyzmetinde.
