Pavlodarda ótetin qysqy Ýnıversıadaǵa 1500-ge jýyq qazaqstandyq sportshy qatysady
ASTANA. QazAqparat - Pavlodarda 1 naýryz kúni bastalatyn elishilik VII qysqy Ýnıversıada oıyndarynda 1500-ge tarta sportshy óner kórsetedi, dep habarlaıdy pavlodarnews.kz oblystyq bilim berý basqarmasyna qarasty aımaqtyq oqý-tájirıbelik dene shynyqtyrý ortalyǵy basshysynyń orynbasary Vıktor Korıakınge siltememen.
«Báseke toǵyz sport túri boıynsha ótedi, - deıdi Vıktor Korıakın. - Bul - shańǵy jarysy, qysqy Prezıdenttik kópsaıys, qysqy sporttyq baǵdarlaý, fýtzal, armrestlıng, gir tasyn kóterý, paýerlıftıng, basketbol jáne qazaq kúresi. Bizdiń óńirdiń atynan 300-deı sportshy baq synaıdy. Mundaı Ýnıversıada Ertis óńirinde alǵash ret ótkizilýde».
Oblystyq dene shynyqtyrý jáne sport basqarmasy usynǵan aqparatqa súıensek, VII qysqy Ýnıversıada oıyndaryna qazirgi tańda Qazaqstan Respýblıkasynyń 31 JOO-nan aldyn ala 1266 ótinim túsken.
Ýnıversıada eki kezeńnen turady. Birinshi kezeńge aldyn ala - 577, ekinshi kezeńge 689 adam aldyn ala ótinim bergen.
2018 jylǵy 1-6 naýryz aralyǵyndaǵy básekeniń birinshi kezeńinde shańǵy jarysy, qysqy prezıdenttik kópsaıys, fýtzaldan jáne basketboldan erler men áıelder arasynda jarystar ótedi.
Ekinshi kezeńde sporttyń 5 túrinen jarystar ótedi: qazaq kúresi, qysqy sporttyq baǵdarlaý, armrestlıng, gir sporty, paýerlıftıng.
Foto: Nıkıta Spıvaka
