Pavlodarda «Otbasymen birge úsh tildi úıreneıik» jobasy júzege asyrylýda

ASTANA. QazAqparat - Pavlodar oblysynda bıylǵy jyly alǵash ret qyrkúıek aıynan bastap ózge ult ókilderine qazaq tilin úıretýge baǵyttalǵan «Otbasymen birge úsh tildi úıreneıik» jobasy qolǵa alyndy.

 Oblystyq tilderdi damytý basqarmasynyń basshysy Sáýle Osmanovanyń aıtýynsha, bul baǵdarlama oblystyq is-sharalar jospary sheńberinde qolǵa alynǵan, dep habarlaıdy pavlodarnews.kz .

 Atalmysh joba bıyl óz nátıjesin beretin bolsa, kelesi jyldan bastap respýblıka deńgeıinde iske asyrylady.

 - 2017 jyldyń sońyna deıin 10 otbasynyń múshelerin, 30 adamdy oqytamyz. Bir top úsh aı ýaqyt oqıdy. Sabaq árbir demalys saıyn ótkiziledi. Kelesi jyly osy baǵdarlama boıynsha 170 otbasyn, ıaǵnı 500-den astam adamdy qamtımyz dep otyrmyz. Sabaqtyń úlgilerin kórermenderge Ýoutube saıty jáne basqa da áleýmettik jelileri arqyly kórsetetin bolamyz, - deıdi Sáýle Osmanova. Oblystyq tilderdi damytý basqarmasynyń bólim basshysy Erjan Tókenovtyń sózinshe, bul maqsatqa oblystyq bıýdjetten 2 mıllıon teńgeden astam qarjy bólingen. - Otbasylarǵa til úıretý kýrsyna tek ózge ulttyń ókilderi ǵana qatysady. Sabaqty oblystyq «Ana tili» ortalyǵynyń dırektory Sholpan Kenjekova júrgizýde. Jobanyń negizgi avtory da sol kisi. Adamdardyń qabyldaý deńgeıine baılanysty bastaýysh, qarapaıym, orta jáne bazalyq deńgeıleri boıynsha oqytady, - deıdi Erjan Tókenov.