Pavlodarda órtenip jatqan úıdiń terezesinen sekirgen qyz kóz jumdy
PAVLODAR. KAZINFORM — Dárigerlerdiń málimetinshe, terezeden sekirgen 23 jastaǵy qyz aýyr jaǵdaıda aýrýhanaǵa jetkizilgen. Júrgizilgen medıtsınalyq sharalarǵa qaramastan zardap shegýshi aýrýhanada kóz jumǵan.
Óńirlik tótenshe jaǵdaılar departamentiniń habarlaýynsha, órt tańǵy saǵat 4-ter shamasynda Pavlodar qalasynyń Baıan batyr kóshesindegi ekinshi qabatta ornalasqan páterlerdiń birinde bolǵan. Jalpy aýdany 20 sharshy metr aýmaqta jıhazdar, úı zattary men terezeler jalynǵa oranǵan. Tilsiz jaýdy tek jarty saǵattan keıin ǵana aýyzdyqtaý múmkin bolǵan.
Órt sóndirý jasaqtary jetkenge deıin janyp jatqan páterden 23 jastaǵy boıjetken sekirip ketken. Qutqarýshylar úshinshi qabattan eki adamdy, sonyń ishinde bir balany syrtqa alyp shyqqan.
— Oqıǵa ornynda 2 jedel járdem brıgadasy men Apattar medıtsınasy ortalyǵynyń 1 brıgadasy jumys istedi. Barlyǵy 6 adam zardap shekti. 2003 jyly týǵan boıjetken aýyr jaǵdaıda Pavlodar qalalyq № 3 aýrýhanasyna, 1972 jylǵy er adam men 1973 jylǵy áıel adam Pavlodar qalalyq № 1 aýrýhanasyna jetkizildi, — dep habarlady Pavlodar oblystyq jedel járdem stantsııasynan.
Ókinishke qaraı, terezeden sekirgen qyzdyń ómirin saqtap qalý múmkin bolmaǵan.
— Zardap shegýshi 12 maýsym kúni saǵat 04:25–te Pavlodar qalalyq № 3 aýrýhanasyna jetkizildi. Júrgizilgen medıtsınalyq sharalarǵa qaramastan, saǵat 05:50–de bıologııalyq ólim tirkeldi. Ólimniń naqty sebebin anyqtaý úshin máıit sot-medıtsınalyq saraptamaǵa jiberildi, — dep málimdedi oblystyq densaýlyq saqtaý basqarmasynan.
Taǵy úsh adam — 8 jasar qyz bala, 18 jastaǵy bozbala men 66 jastaǵy qarııa alǵashqy kómek kórsetilgennen keıin aýrýhanaǵa jatýdan bas tartqan.
Eske sala keteıik, Túrkistan oblysynda jyl basynan beri 139 órt oqıǵasy tirkeldi.
