Pavlodarda órtengen úıden kórshisi eki adamdy alyp shyqty
PAVLODAR. QazAqparat - Pavlodarda órt kezinde anasy men qyzy zardap shekti. Oqıǵa ornynda jeke quramnan 15 adam jáne 4 tehnıka, apattar medıtsınasy ortalyǵy, «102», «103» qyzmetteri jumys istedi, dep habarlaıdy QazAqparat Ravlodarnews.kz saıtyna silteme jasap.
- 7 aqpanda 9 saǵat 19 mınýtta «Ertis» baǵbanshylyǵynda Lımonnaıa kóshesi, 7 mekenjaıy boıynsha órt týraly habarlama tústi. Tórt bólmeli kirpish turǵyn úıde shatyrdyń aǵash qurylymdary, jıhaz ben úı zattarynyń jalpy alańy 45 sharshy metrde janǵan. Órt sóndirýshiler kelgenge deıin kórshisi úıdiń ıesin, 1934 jyly týǵan áıeldi qutqarǵan. Órt kezinde 1963 jyly týǵan qyzy qart anasyn úıdiń tabaldyryǵyna deıin súırep ákelgen, - deıdi Pavlodar qalasy TJ basqarmasynyń ofıtseri Sabyrjan Tastembekov.
Zardap shekken keıýana № 3 Pavlodar qalalyq aýrýhanasynyń jansaqtaý bólimine jetkizilip, aýyr dárejedegi janý ónimderimen ýlaný dıagnozymen jatqyzyldy, jaǵdaıy aýyr.
Sondaı-aq, jedel medıtsınalyq járdem brıgadasy úı ıesiniń qyzyn № 1 Pavlodar qalalyq aýrýhanasynyń terapııa bólimshesine jatqyzdy. Ol úıden ózi shyqqan. Ortasha dárejeli janý ónimderimen ýlaný dıagnozy qoıyldy, jaǵdaıy qanaǵattanarlyq.
Órt 9 saǵat 56 mınýtta sóndirildi. Órttiń shyǵý sebebi men keltirilgen shyǵyn kólemi anyqtalýda.
