Pavlodarda órtelýi tıis qaýipti medıtsınalyq qaldyqtar sol kúıi joıylmaǵan
ASTANA. QazAqparat - Pavlodar oblysynyń ekologııa departamenti qala turǵyndary úshin joǵary ekologııalyq jáne sanıtarlyq-epıdemıologııalyq qaýipti sanalatyn qaýipti medıtsınalyq qaldyqtardy zańsyz ýtılızatsııalaý faktisin anyqtady, dep habarlaıdy QazAqparat tilshisi.
Energetıka mınıstrligi baspasóz qyzmetiniń habarlaýynsha, 2018 jyldyń 27 jeltoqsanynda «Ekom» qoǵamdyq birlestiginiń shaǵymy negizinde memlekettik ekologııalyq ınspektorlar «Ýtılızatsııa» JShS-ǵa jospardan tys tekserý júrgizgen. Tekserý jumystary Qazaqstan Respýblıkasynyń ekologııalyq zańnamasynyń saqtalýy negizinde qolǵa alynǵan.
«Osylaısha ınspektorlar «Ýtılızatsııa» JShS óndiristik bazasy ornalasqan Pavlodar qalasynyń ortalyq ónerkásiptik aımaǵyna jiberildi. Ashyq aspan astyndaǵy jer ýchaskesinde ekologııalyq jáne sanıtarlyq talaptarǵa qaıshy keletin, 27,8 tekshe metr kólemindegi «B» jáne «V» klasyndaǵy medıtsınalyq qapshyqtar qaldyq retinde polıetılen qapta jatqany anyqtalǵan. Al bul qaldyqtar peshte órtelýi tıis bolatyn», - delingen habarlamada.
Bul qaldyqtardyń ıesi - «Ýtılızatsııa» JShS. Sıpattamalarǵa sáıkes, tabylǵan medıtsınalyq qaldyqtar káriptas deńgeıindegi ekologııalyq qaýipti qaldyqtar bolyp otyr: juqtyrylǵan nemese juqtyrylýy ábden múmkin zattar, qanǵa nemese bıologııalyq suıyqtyqtarmen lastanǵan (shprıtster, júıeler jáne t.b.) zattar tótenshe sanıtarlyq-epıdemıologııalyq jaǵdaıǵa ákelýi múmkin.
«Densaýlyq saqtaý basqarmasynyń aqparaty boıynsha, «Ýtılızatsııa» JShS Pavlodar qalasynyń №1 jáne №3 aýrýhanasyna, Ekibastuz qalasynyń №2 jáne №3 emhanalaryna, Jelezın jáne Ertis ortalyq aýdandyq aýrýhanalaryna 2018 jylǵa deıin qyzmet kórsetip kelgen. Zańsyz aınalymda 47,7 tonna qaldyq bolǵan. Jer ýchaskesiniń aýmaǵynda medıtsınalyq qaldyqtardy órteýge arnalǵan pesh ornatylǵan. Osyǵan qaramastan, qorshaǵan ortaǵa lastaýshy zarttar taraǵan. «Ýtılızatsııa» JShS qurylys alańynyń jobalyq qujattamasynda memlekettik ekologııalyq saraptamaǵa qatyspastan medıtsınalyq qaldyqtardy qabyldap, órteı alady», - delingen habarlamada.
«Ýtılızatsııa» JShS ekologııalyq talaptardy buzǵany úshin Ákimshilik quqyq buzýshylyq týraly Kodekstiń 328 jáne 322-baptaryna sáıkes ákimshilik jaýapkershilikke tartylyp, seriktestikke jalpy somasy 144 300 teńgeniń aıyppuly salyndy. Qorshaǵan ortaǵa keltirilgen zańsyz áreketterdiń zııany 1 712 529 teńge dep eseptelip otyr. Quqyq buzǵan seriktestikke ótemaqyny óteý týraly nusqaý berildi.
Sonymen birge, Pavlodar qalasynyń ákimine sanıtarlyq-epıdemıologııalyq talaptarǵa sáıkes medıtsınalyq qaldyqtardy zańsyz alyp tastaý jóninde sharalar qabyldaý ótinishi joldandy.
Pavlodar oblysynyń mamandandyrylǵan aýdanaralyq ekonomıkalyq sotynyń 18 qańtardaǵy sheshimimen qorshaǵan orta men adamdardyń densaýlyǵyna qaýip tóndirgen «Ýtılızatsııa» JShS-nyń zańsyz jumysyn toqtatý týraly anyqtama berildi.
