Pavlodarda ortasha jalaqy mólsheri 137 963 teńgeni qurady
ASTANA. QazAqparat - Pavlodar qalasynyń ákimi Ánýar Kúmpekeev Óńirlik kommýnıkatsııalar qyzmetinde shahardyń 2018 jyldyń on aıyndaǵy áleýmettik-ekonomıkalyq damýyn qorytyndylady, dep habarlaıdy pavlodarnews.kz.
Qala basshysynyń aıtýynsha, bıyl 6933 adam jumysqa ornalastyrylyp, 2838 jańa jumys orny ashyldy.
- Jumysymyzdyń basty baǵytynyń biri - turǵyndar aldyndaǵy áleýmettik mindetterdi oryndaý, - dedi Ánýar Kúmpekeev. - Qala boıynsha ortasha jalaqy mólsheri 137 963 teńgeni qurap otyr. Byltyr áleýmettik qorǵaý salasyna 1,2 mıllıard teńge bólinse, bıyl 1,3 mıllıard teńge bólingen. Ótken jyly áleýmettik kómek is-sharalarymen 29 myń adam qamtylsa, 2018 jyldyń on aıynda 30,7 myń adamǵa áleýmettik kómek kórsetildi.
2018 jyly nátıjeli jumyspen qamtý jáne jappaı kásipkerlikti damytý baǵdarlamasy boıynsha qamtylǵan segiz myń pavlodarlyqtyń 5722-si turaqty jumys oryndarǵa ornalastyryldy. Múmkindikteri shekteýli 344 azamat ta turaqty tabys kózimen qamtyldy.
Qala ákiminiń aıtýynsha, mektepke deıingi mekemelerdi jeke menshiktiń basqarýyna tapsyrý jumysy da qolǵa alynýda. Aıtalyq, Pavlodarda jumys isteıtin 101 balalar baqshasynyń nebary segizi ǵana jeke kásipkerlerdiń qaramaǵynda. Ánýar Kúmpekeev sábıler baqshalaryn memleket menshiginde qaldyryp, memlekettik-jekemenshik áriptestik tetigin 3-6 jas aralyǵyndaǵy balalar baqshalaryna qatysty qoldanýǵa nıetti ekendigin aıtty.
Ánýar Kúmpekeev atap ótkendeı, shahar aýmaǵyndaǵy baǵalardy turaqtandyrý qala basshylyǵynyń basty mindetteriniń biri.
- Oblys ortalyǵynda 26 áleýmettik dúken jumys isteıdi, jyldyń sońyna deıin taǵy úsh dúken ashylady, - dep málimdedi Ánýar Kúmpekeev. - Jyl basynan bastap 44 aýyl sharýashylyq jármeńkesi ótkizilip, 939 mıllıon teńgelik taýar saýdalandy. Jalpy, qalamyzda 19 áleýmettik mańyzy bar azyq-túlikterdiń 80 paıyzy oblystyq deńgeıden arzan. Qalǵan taǵam túrleri boıynsha jumys júrgizilýde.
Baspasóz máslıhaty kezinde shahar basshysy memlekettik til máselesine de toqtala ketti. Memlekettik tildi meńgerý máselesin Ánýar Kúmpekeev jumystyń negizgi kórsetkishteriniń biri dep atady.
- Qalalyqtardyń qazirgi kezdegi memlekettik tildi meńgerýdiń 78,1 paıyzdyq kórsetkishi tómen dep oılaımyn, - dedi Ánýar Kúmpekeev. - Osyǵan qatysty jumys jasaýymyz kerek. Óıtkeni, memlekettik tildi bilý bárimizdiń mindetimiz.
