Pavlodarda Orta Azııadaǵy eń iri kópir ótkelin 91 jastaǵy UOS ardageri ashty
ASTANA. QazAqparat - Búgin Táýelsizdiktiń 25 jyldyǵyna oraı Pavlodarda kópten kútken Ertis ózeni arqyly ótetin Orta Azııadaǵy eń iri kópir ótkeli qoldanysqa berildi.
Elbasy Nursultan Nazarbaevtyń tapsyrmasymen 2013 jyldyń qyrkúıeginde «Nurly jol» baǵdarlamasy boıynsha salyna bastaǵan kópirdi 91 jastaǵy UOS-nyń ardageri Ǵabdýlla Mýsınov ashty, dep habarlaıdy pavlodarnews.kz.
Ǵabdýlla Mýsınov Pavlodarskoe aýylynyń týmasy. 1943 jyly 18 jasynda maıdanǵa attanǵan. Soǵystan keıin Reseı Federatsııasynyń Krasnoıar ólkesinde júrgizýshi bolyp jumys istep, 1955 jyly Qazaqstanǵa oralǵan. Kóp jyldar boıy Ermak qalasynyń avtobazasynda mehanık bolyp, «Úzdik júrgizýshi» atanǵan. Qazirgi ýaqytta jubaıy Marııa Qapsatarovamen Pavlodar qalasynda turyp jatyr. Ardagerdiń tórt balasy, segiz nemeresi men bir shóberesi bar.
"Búgingi kúndi pavlodarlyqtar kópten kútti", - dedi oblys ákimi Bolat Baqaýov. "Aýa raıy da jylynyp, jeltoqsannyń ortasynda «nurly» jańbyr jaýyp jatyr".
Kópirdiń ashylý saltanatyna Qazaqstan Respýblıkasynyń Investıtsııalar jáne damý mınıstrligi Avtomobıl joldary komıtetiniń tóraǵasy Mereke Pishenbaev, «QazAvtoJol»UK» AQ basqarma tóraǵasy Ermek Qızatov, QR Energetıka mınıstri Qanat Bozymbaev, Pavlodar oblysynyń ákimi Bolat Baqaýov jáne oblystaǵy qoǵam ókilderi qatysty. Merekelik saltanat sheńberinde kópirdiń ústimen qazaqstandyq avtoóndiristiń kóshbasshylary - Qostanaıda shyǵarylatyn elektromobılder men avtomobılder JAC iEV5, JAC iEV5S, JAC i3, SsangYong, JAC S3, JAC S5 krossoverleri, Peugeot 301 sedany jáne IVECO Daily kommertsııalyq tehnıkasy júrip ótti.
Aıta keterligi, kópir jańa tehnologııalarǵa səıkes vant tərizdi ıilgish kólbeý aspalardy qoldanýmen jasalyndy. Arkalardy ornatý barysynda «Heavylifting» tehnologııasyn qoldanylǵan. Atalmysh tehnologııa boıynsha arkanyń kóterilýi arnaıy arqandarmen jáne kótergishter arqyly júrgizilgen. Bul ádis arkalyq kópirlerdi qurastyrý boıynsha úzdik ádisterdiń qatarynda. Jobanyń jalpy quny 53,9 mlrd teńgeni quraıdy. Nátıjesinde kópir respýblıkalyq "Ortalyq-Shyǵys" tórt jolaqty avtobannyń bir bóligine aınalady jáne Qazaqstannyń ortalyq bóligin Reseı eliniń kórshiles jatqan óńirlerimen baılanystyrady. Sonymen qatar, jańa kópirdiń ashylýy Aqsý men Pavlodar arasyndaǵy joldy 15 shaqyrymǵa qysqartsa, elimizdiń shyǵys óńirlerinen ortalyq aımaqqa qatynaıtyn tranzıttik kólikter qala ishine kirmeıdi. Osylaısha, joldy 40 shaqyrymǵa qysqartý múmkindigi týdy. Táýligine kópir ótkeli arqyly 10 myńǵa deıin avtokólik ótedi dep josparlanǵan. Uzyndyǵy 12,3 shaqyrymdyq kópir ótkeliniń qurylysyna 13500 metall qurastyrylym, 150 000 tekshe metr beton jumsaldy. Jobany júzege asyrýdyń arqasynda oblystyq bıýdjetke 164 mıllıon teńge kóleminde salyq tústi, al respýblıkalyq bıýdjet 1,9 mıllıard teńgemen tolyqty. Jergilikti bıznes ókilderinen 2,9 mıllıard teńgege taýar men qyzmet túri satyp alyndy. Kópirdiń qurylysyna 1800 adam men 700 birlik tehnıka jumyldyryldy.
