Pavlodarda órt jeti jasar búldirshinniń ómirin qıyp ketti
ASTANA. QazAqparat - Pavlodarda Shókın kóshesi, 87 mekenjaıy boıynsha ornalasqan kópqabatty turǵyn úıde oryn alǵan órt saldarynan jeti jastaǵy qyz bala mert boldy.
Bul týraly oblystyq TJD-niń baspasóz qyzmeti málim etti, dep habarlaıdy pavlodarnews.kz . - Órt saǵat 16.20-da bastalǵan. Saǵat 17.15-te tolyǵymen sóndirildi. Oqıǵa ornynda jeke quramnan 15 adam men alty tehnıka, medıtsınalyq apattar ortalyǵynan úsh adam men bir tehnıka jumys istedi. Qyzyl jalyn 12 sharshy metr aýmaqty sharpyǵan. Sondaı-aq, toǵyz jastaǵy ul bala men 57 jastaǵy er adam, 30 jastaǵy áıel adam ysty gazben ýlaný dıagnozymen aýrýhanaǵa jetkizilgen. Qazirgi tańda órttiń shyǵý sebebi men keltirilgen shyǵyn kólemi anyqtalýda, - dedi departamentte.
Budan basqa, Sharbaqty aýdanynda 210 tonna shóp janyp ketken. Zardap shekkender men qurbandar joq. Aqsý qalasynda Naberejnaıa kóshesi, 41 mekenjaıy boıyndaǵy kópqabatty turǵyn úıde tirkelgen órt nátıjesinde bir adam aýrýhanaǵa jetkizilgen.
