Pavlodarda órt sóndirýshiler alty adamdy órtten aman alyp qaldy
PAVLODAR. QazAqparat - Qalada bir bólmeli páterden órt shyqty, dep habarlaıdy QazAqparat tilshisi.
«19 naýryzda Pavlodar oblysy Tótenshe jaǵdaılar departamentiniń «101» pýltine Gagarın, 63/1 mekenjaıyndaǵy bes qabatty turǵyn úıde órt shyqqany týraly habarlama kelip tústi. Kelgen órt sóndirý bólimsheleri ekinshi qabattaǵy bir bólmeli páterde, dálizde turmystyq zattar men jıhazdar janyp jatqanyn anyqtady», - dep habarlady jýrnalısterge Pavlodar oblysy tótenshe jaǵdaılar departamentiniń baspasóz qyzmeti.
Órttiń jalpy aýmaǵy 8 sharshy metrdi qurady. №3 órt sóndirý bóliminiń órt sóndirýshileri aǵa leıtenant Kárimjanov Erǵalı, serjant Qabylbek Damır, kishi serjant Áýbákirov Áset, kishi serjant Oleg Lopatenko 1985 jyly týǵan páter ıesin aman alyp qaldy. Olar ony páterdiń kireberisinde tapty.
Vedomstvo -rt sóndirý qyzmetiniń jedel-qutqarý jasaǵynyń qutqarýshylary Valerıı Arhıpov, Qanat Ibraev, Tileýbaı Smaıylov, Aleksandr Kolesnıkov, Samat Hamıt balkon baspaldaqpen alpınıstik quraldardyń kómegimen ekinshi qabattan shyqty. Ekinshi qabattan 4 adamdy, onyń ishinde 2 balany qutqardy. №4 órt sóndirý bóliminiń órt sóndirýshileri serjant Suńǵat Rahmetov, serjant Alekseı Maısıýk jáne serjant Rústem Makarov áıeldi aman alyp qaldy. Órt sóndirýshilerdiń súıemeldeýimen 11 adam, onyń ishinde 2 bala baspaldaq boıymen óz betinshe evakýatsııalandy.
Órt 00-27-de sóndirildi. Ottyń tutanýyna elektr symdarynyń qysqa tuıyqtalýy sebep bolǵan. Órt ornynda Pavlodar oblysy TJD jeke quramynan 42 adam jáne 8 tehnıka, Apattar medıtsınasy ortalyǵy, «103», «102»qyzmetteri jumys istedi.
