Pavlodarda órt kezinde segizinshi qabattyń balkonynda qalǵan er adam qutqaryldy
ASTANA. QazAqparat - Pavlodar qalasy Kýtýzov kóshesi, 50 mekenjaıynda ornalasqan 16 qabatty úıde órt kezindegi tehnıkalyq oqý-jattyǵý ótkizildi.
Bul týraly Pavlodar qalalyq TJB bas mamany azamattyq qorǵanys podpolkovnıgi Alma Qutbekova málim etti, dep habarlaıdy pavlodarnews.k z.
«Jospar boıynsha úshinshi qabatta ornalasqan úsh bólmeli páterdiń qonaq bólmesinde kondıtsıoner men elektr symdarynyń tuıyqtalýy saldarynan qyzyl jalyn páterge taraǵan. Órt kúzetinde №16 páterde tútinniń taralýy týraly habarlama kelip tústi. Dereý qutqarýshylar avtobaspaldaqtyń kómegimen segizinshi qabattyń balkonynan bir adamdy ajaldan aman alyp qaldy. Sondaı-aq 30 adam óz erkimen, 20 turǵyn órt sóndirýshilerdiń kómegimen syrtqa shyǵaryldy. Qyzyl jalyn 30 mınýttan keıin joıyldy», - deıdi Alma Qutbekova.
Oqý-jattyǵý kezinde órt sóndirý qyzmeti jáne apattyq-qutqarý jumystary quramynda jeti tehnıka, 25 qyzmetker, TJB ınspektorlary, jergilikti polıtsııa qyzmetiniń músheleri de jumyldyryldy. Sharanyń sońynda kóp qabatty úıdiń qasyndaǵy Kýtýzov, 52, Ak. Shókın, 100 kóshelerindegi úılerdiń turǵyndaryna órt qaýipsizdiginiń erejeleri túsindirilip, jadynamalar taratyldy. Sonymen qatar PIK-tiń músheleri atalǵan úılerge qyzmet etetin uıymdarǵa nusqaýlyq jumystar júrgizdi.
