Pavlodarda oramjapyraq óz baǵasynan úsh jarym ese qymbatqa satylǵan

PAVLODAR. KAZINFORM — Óńirlik saýda jáne tutynýshylar quqyqtaryn qorǵaý departamenti birqatar áleýmettik ónim baǵasynyń shekten tys qymbatqa satylǵanyn anyqtaǵan.

Pavlodar oblysy saýda jáne tutynýshylar quqyqtaryn qorǵaý departamentine bıylǵy alǵashqy 5 aıda tutynýshylar tarapynan 727 ótinish kelip túsken. Bul ótken jyldyń sáıkes kezeńimen salystyrǵanda 10 paıyzǵa kóp. Túsken aryz-shaǵymdardyń basym bóligi bólshek saýda, turmystyq qyzmet jáne elektrondy saýda salalaryna qatysty. Mamandar tutynýshylarǵa 66 mıllıon teńgeden astam qarjyny qaıtarýǵa kómektesken. 

— Áleýmettik mańyzy bar azyq-túlik taýarlaryna júrgizilgen tekserýlerde birqatar ónim baǵasynyń shekten tys qymbatqa satylǵany belgili boldy. Mysaly, qyryqqabattyń kelisi 100 teńgeden satyp alynyp, 450 teńgege satylǵan. Sábiz baǵasy 275 paıyzǵa, kartop 106 paıyzǵa, pııaz 86 paıyzǵa, al qaraqumyq pen taýyq eti tıisinshe 52 jáne 27 paıyzǵa qymbatqa satylǵan, — deıdi departament basshysynyń orynbasary Nursulý Áýbákirova.

Jeke jáne zańdy tulǵalardyń ótinishteri negizinde kásipkerlik nysandaryna 144 tekserý júrgizilgen. Nátıjesinde 64 kásipkerlik sýbektisi ákimshilik jaýapkershilikke tartylyp, zań buzýshylyqtardy joıý jóninde 88 nusqama berilgen.

Eske sala keteıik, Pavlodarlyq balabaqshalarǵa azyq ónimderi 300% qymbatqa jetkizilip turǵan.